ABŞ iki atom bombasını sınaqdan keçirib

“Report” “İnterfaks”a istinadən xəbər verir ki, bu barədə NNSA-nın məlumatında deyilir.

Sınaqlar avqsutun 8-də Nevada ştatındakı Tonopa poliqonunda həyata keçirilib, amma bu barədə məlumat indi verilib.

“F-15E” qırıcı-bombardmançı təyyarəsi nüvə başlığı olmayan iki bombanı aşağı atıb. Sınaqların məqsədi mütəxəssislərin “B61-12″nin qeyri-nüvə funksiyalarını və bombardmançı təyyarənin silah təchizatı qabiliyyətini qiymətləndirməsi olub. İdarədən sınaqların uğurlu keçdiyi bildirilib.

Xatırladaq ki, “B61-12″nin ilk belə sınağı bu ilin mart ayında baş tutub. Atom bombasının sınaqları müasirləşdirilməsi nəzərdə tutulan “B61″in xidmət müddətinin uzadılması çərçivəsində həyata keçirilir. “B61-12″ hazırda mövcud olan “B61″in dörd modifikasiyasını əvəz etməlidir. Onun sınaqları hələ üç il davam edəcək.