Tiflisin yeni havası: “Bir marixuana ver çəkək...”

Azərbaycanda isə bunun mənfi nəticələri ola bilər....

Azərbaycanlılar da çox tez-tez səfər etdiyi Tiflisdə indi yeni mənzərə ilə qarşılaşa bilərlər. Marixuana çəkənlərlə... Üstəlik, “bir marixuana ver çəkək” deyə də bilərlər. Gürcüstanın Konstitusiya Məhkəməsi şəxsi istifadə üçün 100 qrama qədər təzə marixuananın alınması və saxlanılmasına görə həbs cəzasını ləğv edib.

Virtualaz.org məhkəmənin saytında yerləşdirilmiş məlumata istinadən xəbər verir ki, qərarda 100 qram xam marixuananın 50 qram qurudulmuş marixuananın ekvivalenti olduğu göstərilir.

Bildirilir ki, insanın onun sağlamlığını qorumaq bəhanəsi ilə həbs edilməsi yolverilməzdir və 100 qrama qədər marixuana alan və saxlayan insan başqalarının sağlamlığına ziyan vurmur.

Azərbaycanda isə marixuananın istifadəsi qadağandır və bunu istifadə edən, satan şəxslər məsuliyyətə cəlb olunur. Cinayət Məcəlləsinin 243.1-ci maddəsinə əsasən qanunsuz olaraq narkotik vasitələri, psixotrop maddələri və ya onların prekurslarını hazırlama, istehsal etmə, əldə etmə, saxlama, daşıma, göndərmə və ya satma cinayət məsuliyyətinə səbəb olan əməldir. Və buna görə 3 il müddətinədək azadlıqdan məhrumetmə cəzası nəzərdə tutulub. Marixuanaya gəldikdə, onun qurudulmuşu 5 qram, yaş olanı isə 25 qramdan yuxarı, yəni istehlak miqdarından artıq olarsa, cinayət məsuliyyəti yaranır. Narkotik maddələrin satışına görə 3 ildən 7 ilədək, mütəşəkkil dəstə tərəfindən külli miqdarda satışı, daşınmasına görə isə 5 ildən 12 ilədək azadlıqdan məhrumetmə cəzası nəzərdə tutulub.

Ötən il Milli Məclisdə çıxış edən deputat Qüdrət Həsənquliyev Azərbaycanda da narkotik vasitələrdən istifadənin leqallaşdırılmasını təklifini irəli sürmüşdü. Bir sıra ölkələrdə narkomanlara marixuanadan istifadəyə icazə verildiyini xatırladan Q. Həsənquliyev həbsxanada olanların böyük əksəriyyətinin narkotik istifadəçiləri olduğunu vurğulamışdı: “Narkomanları həbsxanalara doldurmağın xeyri yoxdur, dövlət də onların həbsxanada saxlanılması üçün böyük xərc çəkir. O insanlar məcburi müalicəyə göndərilməlidir. Ona görə də satış, daşıma halları varsa, istintaq bunu sübut edirsə, həmin şəxs cinayət məsuliyyətinə cəlb olunmalıdır. Lakin narkotik şəxsi istehlak üçün nəzərdə tutulubsa, bu şəxslərin cinayət məsuliyyətinə cəlb edilməsinə son qoyulmalıdır. Belə şəxslərin narkotik vasitələrdən istifadəsi müəyyən çərçivədə leqallaşdırılmalıdır. Bütün dünya bu addımı atır, biz də atmalıyıq”.

Politoloq Fərhad Mehdiyev Gürcüstan hökumətinin qərarını “Yeni Müsavat”a şərh edib. Politoloq deyib ki, Gürcüstan bu yolla dünyaya bir növ mesaj vermək istəyir:

“Gürcüstanın marixuananı leqallaşdırması, Avropaya yaxınlaşması ilə bağlı deyil. Onu qeyd edək ki, Avropanın bir sıra ölkələrində marixuananın istifadəsinə qadağa var. İkinci məsələ ondan ibarətdir ki, onlar yenə də istehsalat və satışa icazə vermirlər. Sadəcə olaraq, bəzi yerlərdə leqal dozalarda satışa icazə verilir. Müəyyən bir insanın üzərində böyük dozada marixuana tapıldıqda isə o, istintaqa cəlb olunub, bunu kimdən alması müəyyənləşdirilə bilər. Eyni zamanda, bu məsələ həm də dövlətin siyasi iradəsindən asılıdır. Dövlət belə bir mesaj ötürür ki, biz ümumiyyətlə, azadlıqların çərçivəsini artırırıq. Bu kontekstdə bildirmək istəyirlər ki, hətta marixuananın da istifadəsinə icazə veririk. Misal üçünb dövlət siqaretə qadağa qoya bilməz. Çünki siqaretin çəkilməsi səbəbindən heç kim dərhal ölmür. Ancaq heroin belə deyil. Artıq miqdarda bu maddənin istifadəsi nəticəsində insan dərhal ölə bilər. Dövlət də bunu məhdudlaşdırır. Kokain deyə bir maddə var ki, onun da bəzi ölkələrdə bir müddət sonra istifadəsinin leqallaşdırılması mümkündür. Nəticə olaraq deyə bilərik ki, Gürcüstan bu qərarla mesaj verir ki, azadlıqların çərçivəsini genişləndirir. Bir çox dövlətlərdə insanlar həqiqətən də marixuananı istifadə edirlər. Ona görə də Gürcüstan hökuməti bu şəkildə insanları cinayət məsuliyyətindən müəyyən qədər azad etməyə çalışır”.

Politoloq bildirib ki, Azərbaycanda marixuananın istifadəsinə icazə verilməsi xoşagəlməz nəticələrə səbəb olar: “Ümumiyyətlə, marixuananın istifadəsinə yaxşı baxmıram. Heç siqaretin də bir çox yerlərdə çəkilməsi doğru deyil. Əgər Azərbaycanda marixuana çəkilməsinə icazə verilsə, bir çox gəncimiz bundan istifadə edəcək. Siqaret çəkən insanlar bunu da istifadə edə bilərlər. Bu isə cəmiyyət üçün pis nəticələrə səbəb olar. Doğrudur, marixuana insan sağlamlığına digər narkotik maddələr kimi ziyan vurmasa da, bunu istifadə edən insanlar aqressivləşməsə də istifadəsinə yaxşı baxmıram. Mərkəzi sinir sisteminə marixuananın da mənfi təsiri var. Ailələrin dağılması və digər bu kimi halların sürətlənməsinə də təkan verə bilər. Ona görə də hesab edirəm ki, Azərbaycanda bu maddənin istifadəsinin leqallaşdırılması doğru olmaz”.