Qaçqın və Məcburi Köçkünlərin işi üzrə Dövlət Komitəsi bu biabırçılığa da susmaqla cavab verəcək?
Bir müddət əvvəl nəvəsi bahalı maşınla qəza törədərək gündəmə gələn “qaçqınkom” şefinin varidatı insanları heyrətə gətirmişdi.
Əli Həsənov Baş nazirin müavini kimi 2031, komitə sədri kimi isə 1875 manat maaş alır. Bu isə ümumilikdə heç 4000 manat etmir. Belə durumda ağlınızdan keçən sualın mən də fərqindəyəm. “Görəsən, bu dəyirmanın suyu haradandır?” deyə, düşünməkdə də haqlısınız. Nə bilmək olar, bəlkə də 19 ildi önəmli vəzifələri daşıyan 69 yaşlı Əli müəllim, yemədən, içmədən yalnız nəvələrinin oliqarx həyatı üçün çalışıb.
“Çörək pulu”dan gələn milyonlar
Hər halda məcburi köçkünlərin “dondurulmuş” maaşlarının kəsilməsi ilə bağlı Nazirlər Kabinetinə təqdimat verən Əli müəllim nəvəsinə ölkə başçısının sərt çıxışlarını xatırlatmalı, onu bir baba kimi bu yöndə tərbiyə etməliydi. Amma görünür, “Qaçqınkom” sədri daha öncə övladları və nəvələri haqqında mətbuatda yayılan xoşagəlməz xəbərlərdən nəticə çıxarmayıbmış. Bu da ağsaqqalın saqqalının ağlığının bir işə yaramadığının nəticəsi: 2 ölü, biri də nəvəsi Nail Alahverdiyev olmaqla vəziyyəti ağır olan 3 yaralı!
Bütün bunlara görə, cavab verməlisiz, cənab “Qaşqınkom”! Bu məsələ üzləşdikləri çətinliklərə görə “Qaçkınkom”un binasına üz tutan köçkünlərin süründürülməsi qədər asan deyil. Bu məsələ, sizin istefanızı gərəkdirəcək qədər ciddidir! Bir halda ki, bu məmləkətdə adına evi olduğu iddia edilərək məcburi köçkünün “çörək pulu” kəsilirsə, onda hesabat verin görək, bir nəvənizin niyə iki bahalı maşını var?!…
Hesablama Palatası, Baş Prokurorluq yanında Korrupsiyaya qarşı Mübarizə İdarəsi və Maliyyə Nazirliyi komitə sədrinin büdcədən ayrılan pulları necə xərcləməsini araşdıra bilər.
Əldə etdiyimiz bilgilərə görə, artıq hüquq-mühafizə orqanlarında “Qaçqınkom”un fəaliyyəti barədə yoxlama və araşdırma aparılır.
Komitənin dosyesi hazır olduqdan sonra prezidentə məruzə olunacaq. Hətta Ə.Həsənovun korrupsiya fəaliyyəti ilə bağlı cinayət işi başlana bilər.
“Çörək pulu almaq istəyirsənsə 1500 gətir”
Yardım pulları ilə “qidalanan” məmur ordusu böyükdür. Komitə sədrləri, icra başçıları, icra nümayəndələri. Hamı bu “yağlı tikə”dən pay qoparmağa çalışır.
Məcburi köçkünlərin soyulması isə davam edir. Hətta bu boyda qalmaqallardan sonra da.
Bakı şəhəri, Cavadxan küçəsi 18, mənzil 54-də müvəqqəti qeydiyyatda olan Məmmədova Aytəkin Məmməd qızı tərəfindən şikayət ərizəsi daxil olub.
Aytəkin xanım bildirir ki, yuxarıda göstərdiyi ünvanda həyat yoldaşı və iki azyaşlı övladı ilə qalır. Ağdam işğal olunandan burada məskunlaşıblar. İndiyədək dövlətdən ayrılan yardım ağır sosial vəziyyətdə olan ailənin dadına çatıb.
Lakin bir müddət əvvəl ona Qaçqın və Məcburi Köçkünlərin işi üzrə Dövlət Komitəsinin Ağdam Şəhər üzrə nümayəndəsi işləyən Məlahət Həsənova zəng edərək bildirib ki, yardım kəsiləcək, çünki adlarında ev var. Aytəkin Məmmədova deyib ki, ev onların yox, qayınanasının adınadır və bu mənzili hələ Ağdamın işğalından qabaq alıb. Aytəkin xanım , əri və uşaqları burada müvəqqəti məskunlaşıblar. Öz evləri yoxdur, nə də məcburi köçkünlər üçün tikilən evlərdən onlara mənzil düşməyib.
Məlahət Həsənova bildirib ki, bu arqumentlər keçərli deyil, əgər Aytəkin Məmmədova 1500 manat çatdırsa ailə yenə “çörək pulu” alacaq. Əks təqdirdə dövlətin köməyindən məhrum olacaqlar.
Aytəkin Məmmədova çox yalvarıb ki, cəmi 500 düzəldə bilər. Lakin məmur xanım qiymətin 1000-dən aşağı olmayacağını bildirib.
Aytəkin xanımın Məlahət Həsənova ilə söhbətinin audio yazısını təqdim edirik:
Mənbə: DİA.az
MilliYol.Az
Digər xəbərlər
loading...
