Ölkədə saxta araq biznesinin favoriti...“Kristal+” MMC

Saxlanılan şəxslərə məxsus Abşeron rayonu Saray qəsəbəsində yerləşən gizli anbara və sexə baxış zamanı külli miqdarda saxta “Stoliçnaya”, “Absolut” araqları, “Jack Daniels” və “Chivas regal” viskiləri, bu içkilərin hazırlanmasında istifadə edilən mənşəyi məlum olmayan spirt, külli miqdarda aksiz markalar, etiketlər, qapaqlar və digər avadanlıqlar aşkar olunaraq götürülüb. Saxlanılan şəxslər ifadələrində bildiriblər ki, qanunsuz yolla hazırladıqları saxta spirtli içkilərin Bakı şəhəri və respublikanın rayonlarında satışını təşkil etmək istəyiblər. Baş İdarə əməkdaşlarının həyata keçirdikləri təxirəsalınmaz əməliyyat nəticəsində onların bu niyyətlərinin qarşısı alınıb. Ekspert rəyi ilə müəyyən edilib ki, aşkarlanan spirtli içkilər keyfiyyətsiz, istifadəyə tam yararsız və ən əsası insan sağlamlığı üçün ciddi təhlükə mənbəyidir. Toplanmış material prosessual qərar qəbul edilməsi üçün Baş İdarənin İstintaq Şöbəsinə göndərilmişdir…

“Təzadlar” müntəzəm olaraq istehlakçı hüquqlarının ciddi şəkildə pozulması ilə bağlı şikayətlər dərc edib, araşdırmalar aparıb. Oxucular xatırlayar, hələ neçə il əvvəl əməkdaşlarımız Bakının “NZS” qəsəbəsindəki gizli sexdə adi texniki sudan saxta bulaq suyu istehsalı ilə məşğul olan Türkiyə vətəndaşlarının qanunsuz əməllərinin üstünü açmışdı...

İstehlakçı hüquqlarının daha çox pozulduğu sahələrdən biri də araq istehsalıdır. Xarici ölkələrin məşhur brendindən istifadə edərək saxta araq istehsal edərək qanunsuz əməllərlə məşğul olma halları son illər daha da artıb.

Dünən Bakı şəhər sakini Rauf Həmidovun redaksiyamıza təqdim etdiyi “Oryol” və “Kiyev” araqları ətrafında apardığımız jurnalist araşdırması isə dəhşətli faktları üzə çıxardı… Bizə təqdim edilən “Oryol” və “Kiyev” araqlarının üzərinə baxış keçirdik. Məlum oldu ki, şikayətçi də bu istiqamətdə saxtalığına şübhələri olan araqların harada istehsal olunması ilə ciddi məşğul olub:

-Buyurun, siz də baxın, bu araqların üzərində “Ağsu-şərab” MMC yazılıb, yəni istehsalçı bu MMC-dir. Lakin Ağsuda belə bir istehsalçı yoxdur. Adı çəkilən MMC-nin isə hüquqi ünvanı belədir: "Ağsu şəhəri, Firdovsi küç.-7". Həmin ünvana da getdim, bu ünvan da saxtadır, orada elə bir MMC yoxdur. Məhsul istehsalçının yeri-yurdu dəqiq bilinməlidir. Məsələn, mən bu saxta arağı istehsalçıya harada çatdırmalıyam? Araşdırma apardım, məlum oldu ki, bu araqlar Bakıda istehsal olunur və Adil Bağırov adlı iş adamına məxsus “Kristal+” MMC-nin istehsalıdır. Yaxşı, əgər bu araqlar qeyd olunan MMC-nin məhsuludursa və Bakıda buraxılırsa, onda niyə üzərinə “Ağsu-şərab” MMC yazılıb? Hətta qaydaya görə, məhsulun üzərində istehsalçının telefonu da yazılmalıdır. Sən demə, Adil Bağırov adlı sahibkar hazırda istər Azərbaycanda, istərsə də xarici ölkələrdə Ağsu brendini qazanmış, məşhurlaşmış bir istehsalçının minbir əziyyətlə qazandığı reklamından ucuz yolla bəhrələnmək istəyib. Bu isə ciddi qanun pozuntusudur, istehlakçını əsaslı şəkildə aldatmaqdır... Ən maraqlısı budur ki, bu saxta, mən artıq belə deməyə məcburam, araqların etiketini buraxan mətbəələrin də məsuliyyəti yaranır, bu saxta sənəd-etiket istehsalıdır. Xahiş edirəm, bu məsələni hüquq mühafizə orqanlarının diqqətinə çatdırın ki, sahibkar Adil Bağırovun bu qanunsuz əməlinin qarşısı alınsın... 

Adı çəkilən araqların etiketinin üzərində əlaqə telefonu da var: 070-271-00-06. Dəfələrlə zəng etsək də, telefon işləmirdi. Bəs görəsən sahibkar Adil Bağırov bu telefonun işləmədiyindən xəbərsizdirmi? Doğrudanmı kimsə indiyədək bu telefondan istifadə etməyib, zəng qəbul etməyib...

Şikayətçi müstəqil araşdlrması zamanı başqa bir fırıldağın da üstünü açıb. Onun redaksiyamıza gətirdiyi “Çernıy volk” və “Merkuri” araqları da saxtakarlıq nümunəsi idi:

-Şübhələrim və təsadüfi rastlaşma ilə məlum etdim ki, “Çernıy volk” və “Merkuri” araqların da istehsalçıları Ağsu brendindən saxtakarcasına sui-istifadə eşqinə düşüb. Bu araqların üzərində istehsalçı kimi yazılıb: “Ağsu-D.E.N” MMC. Hüquqi ünvan da göstərilib: “Azərbaycan Respublikası, Ağsu şəhəri, 4-cü məhəllə”. Etiketdə isə telefon göstərilməyib... Neçə gün əvvəl Gəncəyə gedirdim, maşını həmin ünvana sürdüm, qapını bir yaşlı qadın açdı, araq istehsalı deyəndə, qadının az qala ürəyi getmişdi... 

(Şəkildə: Adil Bağırov)

Sonra bu araqlardan satan dükanlarda apaşdırma apardım, məlum oldu ki, bu araqlar isə, əslində, Tovuzda buraxılır, Nazim Şükürov adlı şəxsə məxsus sexdir. Nazim Şükürov da həmkarı olan sahibkar Adil Bağırov kimi saxta və qanunsuz əmələ yol verib, Ağsu brendindən sui-istifadə etməyə çalışıb... Sizdən xahiş edirəm, ölkənin nüfuzlu və obyektib mətbuatı kimi, bu məsələni ictimailəşdirin, materialları hüquq mühafizə orqanlarına göndərin, bu qanunsuz əməllərin qarşısı alınsın. Axı əməlinizdə təmizlik və halallıq varsa, niyə öz adınızdan deyil, başqasının adından istifadə edirsiniz???