Gəncə Dövlət Universitetinin nəzdində fəaliyyət göstərən Regional Kollecin əməkdaşları rəhbərliyin əmək müqavilələrində dəyişiklik etdiyini iddia edirlər.
MilliYol.az xəbər verir ki, onlar bu barədə "İctimai TV”yə danışıb.
Kollecin əməkdaşı Günay Əliyeva bildirib ki, ötən ayın sonunda "SİMA” platforması vasitəsilə əmək müqavilələrini yeniləmək istəyərkən sənəddə əvvəlki şərtlərdən fərqlənən müddəalarla qarşılaşıblar. Onun sözlərinə görə, bu dəyişikliklər barədə razılıq alınmayıb: "Müəllim yerinə metallurq yazılıb. Müəllim yazılanlarda isə vaxtamuzd silinərək işəmuzd qeyd olunub. Biz pedaqoq kimi natamam iş saatı ilə işləyirik. Həftəlik 36 saatdır, hər dərs saatımız 13 manat 60 qəpiklə hesablanır, amma bu müqaviləyə görə 8 manat 30 qəpiyə hesablanacaq. Həmçinin məzuniyyətimiz 56 gün yox, 30 gün olacaq”.
Kollecin digər bir əməkdaşı Mətanət Abbaszadə isə qeyd edib ki, eyni ixtisaslar üzrə çalışan müəllimlər arasında dərs saatları bərabər bölüşdürülmür: "Minimum əməkhaqqı 400 AZN olmalıdır. Mən 269 manat pul alıram. Niyə eyni ixtisasdan olan bəzi müəllimlər 800-900 manat alır?! Bu məktəbdə dərs yoxdursa, hamıda eyni olsun”.
İddialarla bağlı GDU-nun nəzdində Regional Kollecin direktoru Xoşqədəm Xudiyeva bildirib ki, müəllimlər gündəlik 5 gün 09:00-18:00 sistemində işləmirlər: "Aldıqları məvacib tədris etdikləri dərs saatına görə olur. Natamam iş rejminə görə belə seçim etdik. Bu onların dərs cədvəllərinə və metodik işlərinə görə təyin olunub. Lakin maaşlarına heç bir təsiri yoxdur. Bütün qərarlar qanunvericiliyin tələblərinə uyğun idarə edilir. Orada təsdiq və imtina seçimləri var, məcburi deyil”.
Daha ətraflı süjetdə:
Digər xəbərlər
loading...
