Hillari Klinton:"Amerika demokratiyası böhran içərisindədir"

O, Trampı çox pis korrupsiyada və irqi motivli bölücü siyasət yürütməkdə suçlayıb.

Keçmiş dövlət katibi bu ittihamları sentyabrın 16-da dərc olunmuş məqalədə səsləndirir və bu qeyri-adi, hətta ABŞ siyasətində misli görünməmiş hadisə sayılır.

Sentyabrın 17-də nə Tramp, nə də Ağ ev məqaləyə cavab veriblər.

Seçki kampaniyası dövründə və ondan sonra Tramp deyirdi ki, Klintona qarşı müxtəlif cinayətlərə görə təhqiqat aparılmalıdır. Bu da prezident seçkisində qalib gəlmiş birisi üçün qeyri-adi hal hesab olunurdu.

Klinton qeyd edib ki, 2016-cı il seçkisindən sonra tərəfdarlarını Trampa obyektiv yanaşmağa, ona liderlik etmək şansı verməyə çağırıb.

“Ümid edirdim ki, gələcəyimiz sarıdan qorxularım şişirdilib. Amma elə deyilmiş”, – o, “The Athlantic” dərgisində dərc olunmuş məqaləsində yazır. “İndi demokratiyamız böhran içindədir”, – xanım Klinton vurğulayıb.

“Tramp ictimai mənafeyi şəxsi və siyasi maraqlarından üstün tutmaq görüntüsü belə yaratmağa çalışmır. Görünür, anlamır ki, dövlət qulluqçuları xalqa xidmət etməlidirlər, başqa yolla getməməlidirlər”, – məqalədə deyilir.

Bu arada siyasi namizədlər və partiyalar noyabrda Konqresə keçiriləcək seçkilər öncəsi özlərinin reklamıyla məşğuldurlar. Trampın sələfi Barak Obama da Demokratlardan namizədləri dəstəkləyir, Trampın siyasətini pisləyir. ABŞ-ın keçmiş prezidentinin öz xələfini belə açıq şəkildə tənqid etməsi də qeyri-adi hal sayılır.

(Azadlıq radiosu)

MilliYol.Az