“Zaminlik müqaviləsində bildirilir ki, Fəxri İsmayılov aldığı mala görə ödəniş edə bilməzsə, onun mənzili satılmalı və müəyyən məbləğdə pul “Mətanət A” şirkətinə ödənilməlidir”
2016-cı il sentyabrın 7-də Kavkaznews.az saytında “ ““Mətanət A” mənim mənzilimi banka girov qoydu”başlıqlı yazı dərc olunmuşdu.
Yazıda “Mətanət A” şirkətinin keçmiş satış üzrə menecerinin şikayətindən söz açılırdı. “Mən şirkətin mallarını müxtəlif marketlərə satırdım. Rəsmi maaşdan əlavə, bizə satış menecerlərinə satılan malın məbləğindən 3 faiz düşürdü.
Şirkət rəhbərliyi işçilərin adına qeyri-rəsmi olaraq depozit açır. Bu depozitə bizim maaşımızın 10 faizi keçirilir. Bu, kəsir ehtimalları üçün edilirdi. Depozitdə toplanılan pullar hər hansı kəsir və çatışmazlığı ödəməyə yönəldiləcəkdi. Mən 2011-ci ildə “Mətanət A” şirkətindən işdən çıxarıldım .
İşdən çıxan zaman heç bir çatışmazlığım, kəsirim yox idi. Depozitimdə 15 min manatdan çox pul yığılmışdı. Mən rəhbərlikdən bu pulu tələb etdim. Amma “Mətanət A” rəhbərliyi depozitdəki pulumu qaytarmaqdan imtina etdi. Mənə dedilər ki, kimə şikayət edirsənsə et, hər yerə əlimiz çatır”, -Fəxri İsmayılov Kavkaznews.az-a bildirdi. Biz “Mətanət A”nın insan resursları departamentinin rəhbəri Sevinc xanıma (təəssüf ki, soyadını bizə bildirmədi – red.) müraciət etdik. “Fəxri İsmayılov şikayətində bildirir ki, “Mətanət A” şirkəti onun depozitindəki pulları mənimsəyib”, – deyə qeyd etdik.
“Mən sizə şirkətimizdə depozit olub-olmadığı barədə məlumat verə bilmərəm. Xüsusilə də, telefonda sizə məlumat verməyim mümkün deyil. Bu məlumat konfidensial xarakter daşıyır”, – deyə departament rəhbəri qeyd etdi.
Bu yaxınlarda Fəxri İsmayılov yenidən “Mətanət A” şirkətinin fəaliyyətiylə bağlı Kavkaznews.az-a şikayətlə müraciət etdi. “Məni bu şirkətə işə qəbul edərkən, “Mətanət A” nın rəhbərləri məndən hər-hansı bir mülkiyyətə sahib olub-olmadığımı soruşdular. “Bəli, mənim evim və maşınım var”,-dedim. “Sizin mülkiyyətiniz bankda girov qoyulacaq”,-şirkətin rəhbərləri mənə bildirdilər. “Hansı əsasla?”,-deyə soruşdum.
“Sizə satış üçün dəyəri 36 min AZN dən çox olan mal veriləcək. Satılan malın məbləğindən 3 faiz sizin gəlirinizi təşkil edəcək. Hansısa əskiyiniz aşkar edildiyi halda, sizin bankda girov qoyulan mülkiyyətiniz satılacaq və beləliklə şirkət öz xərclərinin əvəzini alacaq”,- “Mətanət A” şirkətinin rəhbərləri mənə dedilər. Mən özümə güvənirdim və mənzilimi banka girov qoymağa razılaşdım. Mənim mənzilim “Dəmir Bank” ASC də girov qoyulmuşdu”,- Fəxri İsmayılov bizə bildirdi. “Girovun məbləği nə qədər idi?”,-jurnalistimiz soruşdu. “Girovun məbləği 20 000 manat idi”, – Fəxri İsmayılov cavab verdi.
“Bəs siz, banka faizləri necə ödəyirdiniz?”,-jurnalistimiz maraqlandı. “Satılan malların məbləğindən olan gəlirimin 10 faizi mənim şirkətdə olan depozitimə keçirilirdi. 3 faizi isə, faizlərin ödənilməsi üçün banka yönləndirilirdi”,- Fəxri İsmayılov bizə dedi. İsmayılovun sözlərinə görə : “2010-cu ildə şirkət rəhbərliyinin özü mənə bildirdi ki, “Dəmir Bank” ASC- ə mənim mənzilim qanunsuz olaraq girov qoyulmuşdu”.
“ “Mətanət A” şirkətində işlədiyim dövrdə heç bir əskik aşkar olunmadığına görə mənə, şirkətin “DəmirBank”dan mənzilimin girovdan çıxarılmasını istəməsi haqda məktub verdilər. Mən bu məktubla “DəmirBank”a getdim, sonra mənim mənzilim girovdan çıxarıldı”,- Fəxri İsmayılov Kavkaznews.az-a bildirdi.
Dediklərinin sübutu olaraq, o bizə “Mətanət A” şirkətinin iştirakıyla “DəmirBank” ASC ilə bağlanan müqaviləni təqdim etdi (Kavkaznews.az).
“Mətanət A”nın ictimaiyyətlə əlaqələr şöbəsinin müdiri Şahanə Sarı LEGİON-a bildirdi: “Bizim şirkət ipoteka haqqında müqavilələr bağlamır. Biz bank deyilik”. Lakin şöbə müdiri qeyd etdi ki, “Mətanət A” şirkəti “Dəmirbank” QSC-nin korporativ müştərisidir. “Hazırda məhkəmə orqanları və hüquq mühafizə orqanları Fəxri İsmayılovun həqiqətə uyğun olmayan açıqlamaları ilə bağlı araşdırma aparır”, – deyə Ş.Sarı əlavə etdi.
“Bu barədə Qafqaz Xəbər Agentliyinə də məlumdur. Mən Fəxri İsmayılovla da danışmışam. O, bizim şirkətə qarşı qərəzli mövqe tutur. Həddən çox problemi var və indi dənizdə batanın çöpdən yapışdığı kimi, Fəxri İsmayılov da belə edir”, – deyə “Mətanət A” nümayəndəsi bildirib.
O, hansı “saxta sənəd”dən söz getdiyi barədə bilmədiyini əlavə etdi. “Sizin sözlərinizə görə, notarial qaydada təsdiq olunan sənəd saxtadır?”, – deyə soruşduq. “Mən bilmirəm hansı sənədi nəzərdə tutursunuz, ona görə də, bu barədə bir söz deyə bilmərəm”, – deyə Şahanə Sarı cavab verdi. Biz 3 saylı Notariat Kontorunun notariusu Hacı Orucovdan xahiş etdik ki, sözügedən müqavilə ətrafında yaranmış vəziyyəti şərh etsin.
“Bu sənəd saxta deyil. Ancaq məhkəmə hansı sənədin saxta olub-olmadığı barədə qərar verə bilər”, – deyə notarius LEGİON-a bildirib. Orucov qeyd etdi ki, bu sənəd zaminlik müqaviləsidir. “Müqavilə Fəxri İsmayılov və “Dəmirbank” arasında bağlanıb. Zaminlik müqaviləsində bildirilir ki, Fəxri İsmayılov aldığı mala görə ödəniş edə bilməzsə, onun mənzili satılmalı və müəyyən məbləğdə pul “Mətanət A” şirkətinə ödənilməlidir”, – deyə H.Orucov əlavə etdi.
MilliYol.az
Digər xəbərlər
loading...
