Milli Məclisin sədri Sahibə Qafarova 25-26 aprel tarixlərində Vatikana səfər edəcək.
APA-nın əldə etdiyi xəbərə görə, parlament sədrinin səfərinin məqsədi Müqəddəs Taxt-Tacın başçısı, görkəmli din xadimi Roma Papası Zati-müqəddəsləri Fransisk Həzrətlərinin dəfn mərasimində iştirak etməkdir.
Qeyd edək ki, Roma Papası Fransisk aprelin 21-də vəfat edib.
Fevralın 14-də Papa Fransisk bronxit diaqnozu ilə xəstəxanaya yerləşdirilib. Ona ikitərəfli pnevmoniya diaqnozu qoyulub və bir neçə dəfə süni nəfəs aparatına qoşulub.
Martın 23-də Fransisk 38 gün xəstəxanada qaldıqdan sonra Vatikana qayıdıb. Ötən gün o, Vatikanın Müqəddəs Pyotr meydanında Pasxa bayramı ilə əlaqədar müraciət edib.
Papa Fransisk (əsl adı Xorxe Mario Berqolyo) 17 dekabr 1936-cı ildə Argentinanın paytaxtı Buenos Ayresdə anadan olub. O, italyan əsilli mühacir bir ailənin övladıdır. Gənclik illərində kimya mühəndisliyi üzrə təhsil alıb, lakin daha sonra dini həyata yönəlmiş və 1958-ci ildə Cizvit Ordeninə qoşulub.
Berqolyo uzun illər ərzində müxtəlif dini vəzifələrdə çalışıb: yepiskop, kardinal və Buenos Ayres arxiyepiskopu kimi xidmət göstərib. 2013-cü ilin martında Papa XVI Benediktin istefasından sonra keçirilən konklavda Roma Katolik Kilsəsinin yeni rəhbəri seçilib. O, "Fransisk" adını götürməklə təvazökarlıq və yoxsulluğa qarşı həssaslıq rəmzi olan Assisili Fransiskə ehtiramını bildirmişdir. Bu, həm də Kilsə tarixində "Fransisk" adını daşıyan ilk papa olması ilə yadda qalıb.
Papa Fransisk islahatçı mövqeyi, sosial ədalətə və yoxsul təbəqələrə xüsusi diqqəti, dinlərarası dialoqa verdiyi önəm və iqlim dəyişikliyi ilə mübarizəyə çağırışları ilə tanınıb. O, Katolik Kilsəsində sadəliyin və şəffaflığın gücləndirilməsini prioritet elan edib.
Digər xəbərlər
