Bakı şəhəri, Nizami rayon sakini Cəmilə Nəbiyeva "Orbita" Mənzil-Tikinti Kooperativindən (MTK) şikayətçidir.
Sakin Oxu.Az-a müraciət edərək bildirib ki, sözügedən şirkət icazəsi olmadan çıxarışlı mənzilini söküb.
O qeyd edib ki, sökülən mənzil 1983-cü ildə lampa zavodunda işləyərkən ona verilmişdi:
"Zavodda işlədiyimə görə, Nizami rayonu, Kamil Balakişiyev 6/10 ünvanındakı mənzil mənə verilib. Mən bu evi oğlumun adına özəlləşdirmişəm. 2007-ci ildə sərəncam, 2009-cu ildə isə çıxarış almışam. Evimdə məcburi köçkün ailəsi yaşadığı üçün orada məskunlaşa bilməmişəm. Həmin məcburi köçkünlər də 1993-cü ildə köçüb gələndə məskunlaşmayıblar. Kim istəsə, araşdıra bilər. 2008-ci ilin əvvəlləri gəlib evimə giriblər. Mənim həmin vaxt artıq sərəncamım var idi. Çıxarışı alandan sonra da həmin məcburi köçkün ailəsinin qeydiyyata düşməsi üçün çıxarışı vermişəm, gedib bir nəfər qeydiyyata düşüb. "Orbita" MTK evimi sökməzdən qabaq orada yaşayan məcburi köçkünləri başqa yerə köçürüb, qalmağa yer verib. Qanuni çıxarışım olan mənzilimi isə icazəm olmadan söküblər. Mənim sökülən evimin qarşılığında isə heç nə təklif edilməyib. Evimə girib yaşayan məcburi köçkün məskunlaşdırılır, amma qanuni ev sahibi mən ola-ola icazəsiz sökürlər, hələ sonrasında da heç bir tədbir görmürlər. Bir problem məndədir? Mən bunu başa düşə bilmirəm".
Nizami Rayon İcra Hakimiyyətindən Oxu.Az-ın sorğusuna cavab olaraq bildirilib ki, Nizami rayonu, A.Manafov, K.Balakişiyev və M.S.Ordubadi küçələrinin kəsişməsindəki 2440-cı məhəllədə yerləşən torpaq sahəsi müvafiq qurumların icazəverici sənədləri əsasında sözügedən ərazidə yerləşən, istismar müddətini bitirmiş, müasir yaşayış tələblərinə cavab verməyən yaşayış binalarının sökülməsi, sakinlərin köçürülməsi və onların yeni mənzillərlə təmin edilənədək kirayə haqlarının ödənilməsi şərti ilə icarə əsasında "Orbita" Mənzil-Tikinti Kooperativinin istifadəsinə verilib:
"Azərbaycan Respublikası Fövqəladə Hallar Nazirliyi Tikintidə Təhlükəsizliyə Nəzarət Dövlət Agentliyi "Azkommunlayihə" Kommunal Layihələndirmə İnstitutunun mütəxəssisləri tərəfindən K.Balakişiyev küçəsində yerləşən 6/10 saylı yataqxana tipli binaya texniki baxış keçirilib və binanın vəziyyəti qəzalı, yaşayış üçün yararsız kimi qiymətləndirilərək 17.05.2021-ci il tarixli texniki rəy təqdim olunub.
K.Balakişiyev küçəsində yerləşən 5 mərtəbədən, 2 girişdən ibarət 6/10 saylı yataqxana tipli bina 1963-cü ildə inşa edilib. Qeyd edilən bina müvafiq layihə əsasında 88 mənzildən ibarət inşa edilsə də, ötən illər ərzində ümumi sahələrin zəbti və artırılması sayəsində hazırda sözügedən binada 127 mənzil mövcuddur.
Qeyd olunan binada mülkiyyət sahibləri ilə yanaşı, 1990-cı illərdə öz yurd-yuvalarından didərgin düşmüş ailələr də müvəqqəti məskunlaşaraq yaşamış və məskunlaşmış 6 məcburi köçkün ailəsi də müvafiq razılaşma əsasında MTK tərəfindən köçürülərək müvəqqəti yaşayış üçün mənzillərlə təmin olunub".
Qurumdan Cəmilə Cəfər qızı Nəbiyevanın şikayətində səsləndirdiyi iddiaya cavab olaraq bildirilib ki, qeyd olunan otağın xüsusi mülkiyyətdə olması barədə MTK və balanssaxlayıcı təşkilatda hər hansı məlumat olmayıb:
"Cəmilə Cəfər qızı Nəbiyevanın iddia etdiyi otaq uzun müddətdən bəri məcburi köçkün ailəsi tərəfindən istifadə olunub və son illər ərzində həmin otağın boşaldılması ilə bağlı MTK otaqda məskunlaşan məcburi köçkün ailəsi ilə danışıqlar aparıb və əldə olunmuş razılıqdan sonra həmin məcburi köçkün ailəsi MTK tərəfindən köçürülərək müvəqqəti yaşayış üçün mənzillə təmin olunub. Qeyd olunan otağın xüsusi mülkiyyətdə olması barədə MTK və balanssaxlayıcı təşkilatda hər hansı məlumat olmayıb. Sözügedən otaqda köçürülmə həyata keçirildikdən sonra C.Nəbiyeva otağın onun mülkiyyətində olması barədə çıxarışının olduğunu bildirib.
Hazırda Cəmilə Cəfər qızı Nəbiyevanın məcburi köçkün ailəsinin müvəqqəti məskunlaşdığı mənzilin onun mülkiyyətində olması barədə iddiası tərəfimizdən araşdırılanadək, eyni zamanda, bütün sakinlərlə razılıq əldə olunanadək və aidiyyəti qurumların müvafiq rəsmi icazəsi alınanadək MTK rəhbərliyinə sözügedən binada hər hansı söküntü işlərinin aparılmaması barədə xəbərdarlıq edilib. Həmçinin MTK rəhbərliyi bildirib ki, binada söküntü işləri razılıq əldə olunaraq köçən mənzil sahiblərinin özləri tərəfindən aparılıb.
Hazırda Cəmilə Cəfər qızı Nəbiyevanın müraciəti tərəfimizdən araşdırılır və mövcud qanunvericilik çərçivəsində həlli istiqamətində işlər aparılır, eyni zamanda, vətəndaş C.Nəbiyevaya sözügedən məsələ ilə bağlı məhkəmə müraciət etmək hüququnun olduğu bildirilib".
Məsələ ilə bağlı "Orbita" Mənzil-Tikinti Kooperativinə də sorğu ünvanlanıb.
Digər xəbərlər
