Bu ilin yayında “Sea Breeze”də baş verən kütləvi dava ilə bağlı Cavad Vahid oğlu Muradov və Şamxal İlham oğlu Məmmədov hakim qarşısına çıxarılıb.
HİT.az "Qafqazinfo"ya istinadla xəbər verir ki, Sabunçu Rayon Məhkəməsində baş tutan hazırlıq iclasında hakim Mirheydər Zeynalov iş üzrə zərərçəkən Məhəmməd Həsənzadənin valideyn və vəkillərinə onun telefon danışıqları ilə bağlı çıxarışları təqdim edib.
Vəkillər bu sənədi tələb etmələrini belə əsaslandırır ki, istitaqın qənaətinə görə, “Sea Breeze”də dava düşən zaman Elmir İsmayılov özünün mühafizə rəisi Məhəmməd Həsənzadə və mühafizəçiləri Peyman Vəlizadə və məktəbli M.Ə-nin müşayiəti ilə orada olublar.
Elmir İsmayılov masa arxasında əyləşəndə Məhəmməd Həsənzadə, Peyman Vəlizadə və M.Ə masa ətrafında ayaq üstündə dayanmaqla guya onu mühafizə ediblər. Faktiki isə Elmir İsmayılov restoranda olarkən Məhəmməd Həsənzadə, Peyman Vəlizadə və M.Ə orada olmayıblar. İstintaq dövründə Məhəmməd Həsənzadənin vəkilləri dəfələrlə vəsatət qaldıraraq ona məxsus telefon-anten məlumatlarının alınması üçün mobil operator “Azercell”ə sorğu göndərilməsini tələb ediblər. Lakin istintaq dövründə vəsatət təmin edilməyib.
Bu səbəbdən də eyni məzmunlu vəsatəti Məhəmməd Həsənzadənin vəkilləri məhkəməyə də təqdim ediblər. Hakim Mirheydər Zeynalovun “Azercell”ə verdiyi sorğuya cavab isə istintaqın Elmir İsmayılovun restorana Məhəmməd Həsənzadə, Peyman Vəlizadə və Murad Əhmədlinin mühafizəsi ilə gəlməsi qənaətini, ümumilikdə isə ittihamını təkzib edir.
Əslində isə Məhəmməd Həsənzadənin “Sea Breeze”yə gəlməsi belə olub:
Elnur Məmmədov restoranda dava salıb Elmir İsmayılova xəsarət yetirdiyi, maşınını əzib-sındırdığı saatlarda Məhəmməd Həsənzadə Bakının Mərdəkan qəsəbəsində olub.
“Azercell”dən verilən cavabdan da görünür ki, hadisə günü Məhəmməd Həsənzadə dava zamanı “Sea Breeze”nin yerləşdiyi Nardaran qəsəbəsində deyil, ondan təxminən 23-24 kilometr aralıda yerləşən Mərdəkanda olub.
Məhəmməd Həsənzadə Mərdəkanda sinif yoldaşı Elgün İsmayılov, Peyman Vəlizadə və M.Ə ilə birgə istirahət ediblər. O zaman Elmir İsmayılov qardaşı Elgün İsmayılova zəng edib. O, “Sea Breeze”də dava düşdüyünü, ona xəsarət yetirildiyini və maşınının əzildiyini bildirib.
Elmir İsmayılov qardaşı Elgündən xahiş edib ki, “Sea Breeze”ə gəlib onu xəstəxanaya çatdırmağa kömək etsin. Elgün İsmayılov Mərdəkandan Nardarana gələrkən dostları Məhəmməd Həsənzadə, Peyman Vəlizadə və M.Ə də onun maşınına minərək birgə gəliblər. Onlar da Elgün İsmayılovla birgə “Sea Breeze”də restorana daxil olub Elmir İsmayılovu axtarıblar.
Elgün İsmayılov dostları ilə “Sea Breeze”ə gəldikləri vaxt artıq Elmir İsmayılovun xəsarət alması, maşınının əzilməsi ilə müşayət olunan davadan 1 saatdan artıq vaxt keçib.
Onlar restorana daxil olandan sonra yanlış olaraq Elnur Məmmədov və ətrafındakı kütlə istiqamətinə yönləndiriliblər.
Elnur Məmmədov və ətrafındakılar Elmir İsmayılovu axtaran onun qardaşı Elgün İsmayılovu, Məhəmməd Həsənzadəni, Peyman Vəlizadəni də döyüb xəsarət yetiriblər.
Qeyd edək ki, Elnur Məmmədov Binəqədi İcra Hakimiyyəti başçısının sabiq müavini Leysan Məmmədovun oğludur.
Digər xəbərlər
