Boğaza qədər çirkaba bulaşmış Azərbaycan futbolunun dünən daha bir utanc səhifəsi yazıldı. Xaqani Məmmədovun yetişdirdiyi "istedadlı" hakimlərdən olan Ramil Diniyev yüzminlərlə azarkeşin sevgisinə tüpürüb "Xəzər Lənkəran"ı I diviziona göndərdi.
"Xəzər Lənkəran"ı kimlər bitirdi?
Dünyada heç bir hakimin vermədiyi qərarı verib "Xəzər Lənkəran"ın qapısına penalti təyin edən Diniyev AFFA-nın binasında oturan rəhbərlərinin iç üzünü açıb ortaya qoydu. Bir daha məlum oldu ki, "Xəzər Lənkəran" kimi klub orda oturanların heç birinə - nə Elxan Məmmədova, nə Ramin Musayevə, nə Xaqani Məmmədova, nə də qalstuklu nazirlərlə, şirkət prezidentlərinə, onların müavinlərinə lazım deyil. Onlara "Sumqayıt" kimi, "Kəpəz" kimi, lap elə "Neftçi" kimi buyruq qulları lazımdı ki, barmaqlarını hansı istiqamətə tutsalar ora getsinlər, bunların ciblərini doldursunlar.
Ötən gün başa vurduğumuz futbol mövsümü hakim rusvayçılıqları ilə yaddaşlarda qalacaq. "Xəzər Lənkəran"a qarşı edilən haqsızlıq bu mövsüm ilk olmadı, sonuncu da olmayacaq. Zaman keçəcək, hər şey unudulacaq və "qəhrəmanlar" yenə iş başında olacaq.
Bütün bunların günahkarı kimdi? Təkcə Xaqani Məmmədovmu? Özü boyda çirkabın içində olan bu adam daha neyləməlidi ki, arxasından bir təpik vurub AFFA-nın binasında qovulsun? Qurumun keçmiş rəhbərliyi tərəfindən rüşvətə görə futboldan silinən sabiq FIFA referisi hansı üstün keyfiyyətlərinə görə bu qədər öqəmli vəzifədə oturub, bunu bilən varmı?
Hələ utanmaz-utanmaz durub deyir ki, Ramil Diniyevin penalti qərarı doğrudu. Səbəbkar - "Rəvan"ın futbolçusu Ruslan Tağızadə həmin epizodda penalti olmadığın deyir və "Xəzər Lənkəran" azarkeşlərindən üzr istəyir. Həyasızlığın dərəcəsinə bax ki, hakimbaşı futbolçunun belə üzünə durur, onu səhv çıxardır.
Üstəlik, Ramil Diniyevin qərəzli olmadığını sübut etmək üçün növbəti "quşu" buraxır ki, bəs "hakim qərəzli olsaydı "Rəvan"ın TƏMİZ QOLUNU sayar, penaltidən sonra "Xəzər Lənkəran"ın qapısına iikinci penaltini təyin edərdi". Bəs deyirdin, hakim oyunu yaxşı idarə edib? Belə çıxır ki, Ramil Diniyev oyunda daha iki kobud səhvə yol verib (fərqi yoxdu, hansı tərəfə). Bu boyda iki səhvə yol verən ("Xəzər Lənkəran"ın qapısına təyin edilən penaltini nəzərə almıram) hakim oyunu necə yüksək səviyyədə idarə edib?
Ramil Diniyev... Üç il əvvəl hakimlikdən qovulan bu adamı hansı sirrli əllər yenidən hakimliyə gətirdi? "O bir də hakimlik etsə, mən kişi deyiləm, burdan gedərəm" deyən Ramin Musayevə kim sözünü geri götüzdürdü? Bu adam daha neçə komandanın belini qırmalıdı ki, Azərbaycan futbolunu bazara çevirənlər yuxudan oyansın?...
Futbolumuzun ögey övladı - "Xəzər Lənkəran"
AFFA və PFL-in başında oturanlar həmişə "Xəzər Lənkəran"a qarşı "ögey övlad" münasibəti bəsləyib. Sanki bu klubun Azərbaycan futboluna dəxli yox imiş kimi davranırlar. Olmayan "Sumqayıt"ı Premyer Liqaya sürükləyib gətirənlər, 2 dəfə aşağı liqaya düşsə də qoruyub saxlayanlar, heç nəyi olmayan "Kəpəz"i Premyer Liqaya çıxardanlar, dağılmış "Simurq"un xarabalıqlarında "Zaqatala"nı yaradanlar, "Turan"ın adını 2 dəfə dəyişib yaşadanlar nədənsə bugünədək bir dəfə dönüb "Xəzər Lənkəran"a tərəf baxmayıblar.
Niyə? Çünki onlara müstəqil, öz sözünü deyən, bunların barmağının girmədiyi klub lazım deyil. Elxan Məmmədova qazanc gətirməyən klub çempionatda oynaya bilməz. Ramin Musayevin "Neftçi" dövründən kin saxladığı klubun Premyer Liqada oynamaq, uğur qazanmaq haqqı verilmir. Xaqani Məmmədov üçün isə heç nəyin fərqi, dəyəri yoxdu, nə olursa-olsun sifarişlər yerinə yetsin, "dayı"larından "sağ ol" alsın.
"Xəzər Lənkəran"a niyə lisenziya verilmədi?
"Xəzər Lənkəran"ın məhvinin əsası bir neçə gün əvvəl qoyulmuşdu. AFFA-nın Premyer Liqada oynamaq üçün lisenziya vermədiyi klubun zatən çempionata buraxılmayacağı bəlli idi.
"Xəzər Lənkəran"a niyə lisenziya verilmədi? Maliyyə məsələlərinə görə. Klubun keçmiş futbolçularına borcu var. Hansı klubun borcu yoxdu ki? Məgər, UEFA "İnter"i futbolçularına borcu olduğu üçün avrokuboklardan kənarlaşdırılmadı? Dünyanın böyük klublarından olan "Milan"ın, "İnter"in, "Qalatasaray"ın belə futbolçulara milyonlarla borcu var. Bəs onlara niyə lisenziya verilir?
Bəs yayda bir həftəyə yaradılıb Premyer Liqaya gətirilən "Rəvan" lisenziyalaşdırma qaydalarına cavab verirdi? Yoxsa, bostanlıqda, qəzalı vəziyyətdəki stadionda futbol oynayan "Kəpəz" bütün şərtləri yerinə yetirib? Bəlkə hansı amala xidmət etdiyi bilinməyən "Sumqayıt"da hər şey yağ-bal kimidi? Onların "Xəzər Lənkəran"dan da betər vəziyyətdə olduğunu hamımız bilirik. Təyyarə tutub, "İnter"i az qala bütün Avropada gəzdirən, bütün səfər xərclərini ödəyən AFFA niyə "Xəzər Lənkəran"a ögey münasibət göstərir, niyə heç bir güzəşt etmir? Təkcə ona görə ki, Elxan Məmmədovun, Ramin Musayevin bu kluba sözü keçmir, orda istədiklərini edə bilmirlər.
Mübariz Mənsimov hardadı?
"Xəzər Lənkəran"ın bu vəziyyətə salınmasının günahkarı təkcə AFFA binasında oturanlardırmı? Yox, onlar qədər klubun sahibləri, onu idarə edənlər də günahkardı. Elə biri Mübariz Mənsimov. Bu günə qədər milyonlarını klub üçün xərcləyən, bütün futbol azarkeşlərinin sevgisini qazanan bu adam öz yaratdığı komandanı niyə yarı yolda qoydu? Məgər, "Palmali" şefinin kluba ayırmağa 2-3 milyon pulu yox idi ki, "Xəzər Lənkəran" hər kəs üçün qapazaltıya çevirildi? Var, özü də çoxdu, bir yox, 10 "Xəzər Lənkəran" saxlayacaq qədər var. Xərcləmək istəmir, biznesmendi, gəlir olmayan sahəyə pul qoymaq istəmir. Getmək istəyir, amma gedə bilmir. Bəhanə axtırır... Və deyəsən, artıq bəhanə də hazırdı...
Klubu buraxıb Allahın və birdə burdakı qardaşı Mais Mənsimovla Tuyqun Nadirovun ümidinə. Onların günahı yoxdurmu? Var, özü də hamıdan çox. Bu gün "Xəzər Lənkəran"la bağlı FIFA-da onlarla şikayət varsa, günahkarı məhz onlardı. Bu gün "Xəzər Lənkəran" futbolçularına maaş verməyə pul tapmırsa, günahkarı onlardı. Bu gün "Xəzər Lənkəran" I diviziona düşürsə, günahkarı yenə onlardı.
Bir vaxtlar Elxan Məmmədova sığınıb Klublar Komitəsinə sədr seçilən Tuyqun Nadirov bir gün başlarına bu müsibətin gətiriləcəyini bilməli idi. İndi həmin Elxan Məmmədov "Xəzər Lənkəran"a qarşı haqsızlığa niyə etiraz etmir? Niyə batmaqda olan klubu xilas etmək üçün yardım əlini uzatmır? "Sumqayıt"a, "Kəpəz", "İnter"ə, "Turan", "Zaqatala"ya edilən güzəştlər niyə "Xəzər Lənkəran"a olunmur? Görəsən, Tuyqun Nadirov bu sualları dostu Elxan Məmmədova veribmi?
Mübariz Mənsimov gəlib haqqını tələb etsin
Son söz yenə Mübariz Mənsimovundu. İllər əvvəl əziyyətlə yaradıb bu yerlərə gətirdiyi klub səhnədən bu şəkildə çəkilməməlidi. Mübariz Mənsimov gəlib AFFA-nın binasında oturub, haqqını tələb etməli, ədaləti bərpa etməlidi. Ondan sonra istəyir klubu dağıtsın, istəyir yaşatsın. Amma bu şəkildə yaxasını kənara çəkməklə heç nəyə nail ola bilməyəcək. Əksinə, onminlərlə azarkeşin hisslərinə, sevgisinə hörmətsizlik etmiş olacaq.
P.S: Ramin Musayevin son açıqlamaları göstərir ki, "Şərurspor" gələn mövsüm Premyer Liqada olacaq. Hər halda, PFL prezident artıq işarəni verib. Həmin "Şərurspor" ki, bir mövsümdə artıq özündən söz etdirib, I divizionu qumarxanaya çevirib. Deyəsən, Musayevin inkişafından bəh-bəhlə danışdığı, iştirakçılarının yarıdan çoxu səfələt içində yaşayan Premyer Liqanı da qumarxanaya çevirmək istəyirlər. Nə deyirik, bazarınız bol olsun.
Pərvin Kazımoğlu
Fanat.az
Digər xəbərlər
loading...
