Xəbər verdiyimiz kimi, Rusiya prezidenti Vlamidir Putin bu gün prezident adminstrasiyasının rəhbəri Sergey İvanovu tutduğu vəzifədən azad edib.
Vladimir Putin onun yerinə Anton Vaynonu təyin edib.
Putinin bu təyinatı siyasi müşahidəçilər üçün olduqca gözləniməz olub.
Çünki Vayno siyasi dairələrdə boz fiqur kimi tanınıb və daha çox aparat işçisi kimi fəaliyyət göstərib.
Musavat.com Rusiya mətbuatına istinadən Rusiyanın icra strukturunda prezident və baş nazirdən sonra ən qüdrətli postuna gətirilən bu məchul şəxs barədə maraqlı məlumatlar əldə edib.
Qeyd edək ilk növbədə Rusiyanın ən rütbəli bürokratının milliyəti diqqət cəlb edir.
Məlum olduğu kimi, Anton Vayno milliyətcə estondur. Vaynonun ailə şəcərəsi ilə bağlı digər bir maraqlı məqam onun babası Karl Vaynonun vaxtilə sovet Estoniyasının Kommunist partiyasının 1-ci katibi, yəni əslində Estoniyanın rəhbəri olması ilə bağlıdır.
Karl Vayno 1923-cü ildə Rusiyanın Tomsk şəhərində eston kommunisti Henrix Vaynonun ailəsində dünyaya gəlib. O, 1978-ci ildə Yohannes Kebini əvəz edərək Estoniya KP MK-nını 1-ci katibi vəzifəsinə gətirilib . Karl Vayno bu vəzifəni 1988-ci ilə qədər tutub.
Baltikyanı respublikalar sovet əsarətindən qurtulduqdan sonra o, Moskvaya köçüb və Rusiya vətəndaşlığını qəbul edib.
Anton Vayno isə keçmiş sovet rəhbərlərinin öz övladlarını oxutdurmağa üstünlük verdiyi ali təhsil ocağı sayılan-Moskva Dövlət Beynəlxalq Münasibətlər İnstitutunu (MGİMO) bitirib.
Anton Vayno karyerasına Rusiyanın müxtəlif ölkələrdə yerləşən səfirliklərdə diplomat kimi başlayıb.
Vayno daha sonralar Rusiya Federasiyası prezidentinin protokol idarəsinə çalışıb.
2008-ci ildə isə o, Vladimir Putinin Rusiya hökumətinin başçısı olduğu dövrdə hökumət aparatı rəhbərinin müavini olub. 2011-2012-ci illərdə Anton Vayno baş nazir Vladimir Putin tərəfindən hökumət aparatını rəhbəri vəzifəsinə gətirlib.
Vladmir Putin yenidən Rusiya prezidenti seçildikdən sonra onu öz yanına götürüb və prezident adminstrasiyasının rəhbər müavini təyin edib.
Qeyd edək ki, Anton Vaynonun atası Rusiya-Kuba iş şurasının sədri, Avtovaz-ın vitse prezidentidir.
Siyasi ekspertlərin fikrincə bütün bunlar Vladimir Putinin bu adama olduqca etibar etdiyni göstərir.
Vaynonun əvəz etdiyi Segey İvanovun təyin edildiyi yeni vəzifə olduqca qəribədir. Belə ki Rusiya prezidenti bütün ömrünü Rusiya xüsusi xidmət orqanlarında və təhlükəsizlik strukturlarında keçirmiş Sergey İvanovu özünün ətraf mühit, ekologiya və nəqliyyat üzrə xüsusi nümayəndəsi təyin edib.
Rusiya politoloqu Vladmir Smirnov gazeta.ru-ya verdiyi açıqlamada Sergey İvanovun hesabdan silnməsinin hələ erkən olduğunu söyləyib. “Yaddan çıxarmayaq ki, o bu yaxınlara qədər Putinin varislərindən biri hesab edilirdi”.
Ukrayna politoloqu Vitali Portnikov isə Anton Vayno sovet zadəgan nomenklaturasının nümayəndəsi hesab edir . “Vayno ömür boyu protokolçu olub. Çətin ki o,Sergey İvanov kimi siyasi oyunlarda müstəqil oyunçu kimi iştirak edə bilsin" deyə politiloq Ukraynanın liga.net saytında yazır. (musavat.com)
Qaynarinfo.Az
Digər xəbərlər
loading...
