"15 yaşımda oğlan xəbər göndərmişdi, razı olmadım"
Azərbaycanı “Eurovision-2016” mahnı müsabiqəsində təmsil edən Səmra Rəhimlinin müsahibəsi
- İlk öncə “Eurovision”dakı çıxışınız barədə danışardınız.
- Düşünürəm ki, yaxşı çıxış etdim. Çünki məşqlər zamanı xəstə idim, özümü pis hiss edirdim, amma finala yaxın yaxşılaşmışdım. Azərbaycan üçün əlimdən gələni etdim.
- Amma müsabiqədə 17-ci yeri qazanmağınız çoxlarının ürəyincə olmadı...
- Nəticələr məndən asılı deyildi. Mən müğənni olaraq əlimdən gələni etdim. Məndən tələb edilənləri yerinə yetirdim. Bu, bir müsabiqədir. Burada udmaq da var, uduzmaq da. Düşünürəm ki, əsas yadda qalmaq və sevilməkdir.
- Yəni qalib olmasanız da, yaddaşlarda qaldınız?
- Bəli, görürəm axı. Görürəm ki, məni Avropadan da dəstəkləyənlər çoxdur. Bu da məni sevindirir.
- Fikrinizcə, bu günə qədər Azərbaycanın ən uğurlu “Eurovision” təmsilçisi kimdir? Özünüzü də deyə bilərsiniz.
- Heç bir zaman özümü kənardan görə bilmirəm. Yəni özüm barədə nəsə deyə bilmərəm. Məncə, ən uğurlu çıxışı 2008-ci ildə Elnurla Samir edib. Bir də Fəridin çıxışı xoşuma gəlmişdi.
- Bu günə qədər Azərbaycanı “Eurovision”da təmsil etmiş hansı iştirakçılardan dəstək gördünüz?
- Eldar Qasımov, Samir Cavadzadə, Elnur Hüseynov, Safura Əlizadə məni dəstəklədi.
- Müsabiqə zamanı və ondan sonra geyimləriniz çox müzakirə olundu.
- Geyimim yalnız Azərbaycanda müzakirə olundu. Geyimə görə əxlaqa qiymət verməzlər. Geyimə qalsa, elə uzun geyinən xanım sənətçilərimizi görmüşəm ki... Bakı balaca şəhərdir axı. Geyimə görə insana qiymət vermək düzgün deyil. Mənim ancaq geyimimdən danışa bilərlər, yəni başqa nöqsan tapa bilməzlər. Mənə olunan tənqidlərə sosial şəbəkədə “siz düşünürsünüz ki, sizin fikirləriniz mənə maraqlıdır?” şərhini yazmışdım. O fikrimdə də qalıram. Bu tənqidlər mənim heç vecimə də deyil. Maraqlı da deyil. İstəsəm, uzun, istəsəm, qısa geyinəcəm. Buna bədən ölçülərim də imkan verir. Artıq çəkim də yoxdur ki, deyim, biədəb görsənir, geyinməyim. Ümumiyyətlə, məncə, insana nə rahatdırsa, onu da geyinməlidir.
- Sanki ənənəyə çevrilib. Azərbaycanı hansı xanım müğənni “Eurovison”da təmsil edirsə, müsabiqədən sonra ailə qurur...
- Hələ ki, ailə qurmaq fikrində deyiləm. Amma bu Allahın işidir. İndi mən desəm ki, heç vaxt - bu da düzgün olmaz.
- Elçi düşənlər olub?
- Əlbəttə olub. Amma mən özümü musiqiyə o qədər həsr etmişəm ki, yadımda deyil, axırıncı dəfə nə vaxt münasibətim olub. Yəni bu hissləri yaşamışam. Mənə olan evlilik təkliflərini yaxına buraxmamışam. Çünki hələ tezdir.
- Hazırda Səmranın sevdiyi bəy yoxdur?
- Yox, yoxdur. Səmranın sevməyi də çətindir.
- Bu günə qədər sevmisiniz?
- Bəli, amma ona sevgi deməzdim. Bu sevgi çoxdan olub, bitib. Uşaqlıq sevgisi idi. Məncə, yetkin yaşda sevmək başqadır.
- Ailə qurmaq istədiyiniz bəy azərbaycanlı olmalıdır, yoxsa...
- Bunu öncədən demək düzgün olmadı. Bilmək olmaz.
- Müsahibədən öncə ananız söylədi ki, qızımı yalnız avropalı oğlana verərdim.
- Anam mənim düşüncələrimə görə elə deyir. Yəni Azərbaycanda mənim düşüncələrimə uyğun bir bəyi tapsam, ailə quraram. Azərbaycanlı da ola bilər, amma müasir düşüncəli, dünya görüşlü, özümə uyğun biri olmalıdır.
- Söylədiyiniz xüsusiyyətlərə uyğun olsa, amma desə ki, sənəti at, bəs onda necə?
- (Gülür) İndi bu barədə nəsə desəm, tez olar. İndidən “heç vaxt sənətdən getmərəm” və ya başqa sözlər deməyim. Çünki Allah bəzən “heç vaxt” dediyimiz sözləri bizə etdirmiş olur. Həyatımda belə faktlar çox olub. Demişəm ki, filan şeyi heç vaxt etmərəm, amma etmişəm. Amma bircə onu deyə bilərəm ki, həyatımı musiqisiz təsəvvür etmirəm. Bu günə qədər həyatımda nə etmişəmsə, musiqiyə görə etmişəm. Fikirləşməmişəm ki, nə vaxtsa ailə quranda sənəti ataram.
- Sizin üçün ailə qurmağın yaşı varmı?
- Yox, ailəni yaşla yox, özümü hazır biləndə quracağam. Həyatda hər şeyə nail olum, daha sonra ailə. İndidən neçə yaşımda ailə quracağımı deyə bilmərəm. Bilmək olmaz, bəlkə bir ilə hər şey oldu. Amma tələsik də nəsə etmək olmaz. Sevmək lazımdır.
- Sizə ilk elçi neçə yaşınızda gəlib?
- Bəlkə 16-17 yaşımdan da az olardı, mənə elçi gəlmək istəyirdilər. Yəni oğlan tərəfi qapımızı döymədən öncə xəbər göndərmişdi. Amma mən razı olmadım. Biz də var axı qızı qabaqcadan nişanlayırlar ki, bu, bizimdir (gülür). Anam hər zaman deyir, qızım ailə qurmağa tələsmə. Həmişə sevmək, ailə qurmaq olar. Əsas sənətdir.
- Daim pozitiv görünürsünüz. Amma insanın kefsiz anları da olur. Nədən kefiniz pozula bilər?
- Mən heyvanları çox sevirəm. Onları incidən olanda kefim pozulur. Ümumiyyətlə, bizim ailə heyvanları çox sevir.
- Bir çoxları sizi Röya Ayxana bənzədir. Röya da müsabiqə zamanı sizə dəstək olduğunu açıqlamışdı.
- Bənzəməyimizi indi eşidirəm. Amma mənə dəstək olduğunu görmüşdüm. Çox sevindim ki, bizim şou-biznesdə də məni dəstəkləyənlər var.
- Səmranın dostu varmı?
- Tək dostum anamdır. Hər yerə onunla gedirəm. Mən hər zaman oğlanlarla dostluq etmişəm. Hər zaman oğlanlarla dostluğum tutub. Amma indi dostum, sirdaşım yalnız anamdır. Son illərdə dostluğun nə olduğunu anlamışam. Dost sənin ailənin içidir. (Lent.az)
MilliYol.Az
Digər xəbərlər
loading...
