Bir neçə gün əvvəl işdən çıxarılan "Azəriqaz" İstehsalat Birliyinin baş direktoru Ruslan Əliyev Səbail rayonu, Badamdar qəsəbəsində evini satışa çıxarıb.
Valyuta.az-a daxil olan məlumatda iddia edilir ki, təxmini dəyəri 1.5 milyon manat olan Ruslan Əliyevə məxsus villa satışa qoyulub. Badamdar qəsəbəsinin ən prestijli yerlərindən birində yerləşən villanın hansı məbləğə və nəyə görə satışa çıxarılması məlum deyil.
Üç mərətəbəli villa Badamdar qəsəbəsi, Şıxov çimərliyinə baxan istiqamətdə 15 sot ərazidə yeni inşaa olunub. İşlər tam yekunlaşmasa da, villaya kifayət qədər xərc çəkildiyi görünür.
Vəzifəsindən bu günlərdə azad edilən Ruslan Əliyevin Azərbaycanda və xaricdə bir çox mülk və obyektlərinin olduğu da istisna edilmir.
Mənbə onun xüsusən "Azəriqaz" baş direktorunun istismar üzrə müavini Cahid Hüseynovla birgə bizneslər qurduğunu da deyir. Onların Bakı və Şamaxı şəhərlərində, Salyanın Qaraçala kəndində evləri, ticarət obyektləri, Salyan rayonu ərazisində istixana kompleksləri, tikinti materialları bazarı, balıqçılıq və heyvandarlıq təsərrüfatları, Şamaxı şəhərinin Çuxuryurd və Məlhəm kəndlərində villaları, Səbail, Xətai və Nərimanov rayonlarında mülkləri mövcuddur.
Qaxın Xal-Xal kəndində yerləşən məşhur "Şəlalə Farel" Ailəvi İstirahət Mərkəzinin də Ruslan Əliyevin olduğu iddia edilir. İstirahət mərkəzinin onun yaxın adamının adına rəsimləşdiyi deyilir.
Fotolar
Digər xəbərlər
