Ərgün Dilər
“Takvim”, Türkiyə, 21 may 2020-ci il
Zirvədə gedən savaşı anlaya bilməsək, ətrafımızda baş verənləri anlamaq şansımız heç yoxdur. Qılınclar çəkilib, silahlar atəş açıb, mübarizə bütün sürətilə davam etməkdədir. Bu atmosferdə önə çıxan şəxs, təbii, ABŞ Prezidenti Donald Trampdır. Bəzilərinə görə, Tramp çox ağıllıdır, bəzilərinə görəsə yox.
Trampın 4 il sonra təkrar “Obamagate” toxumlarını əkməyə başlaması onun nə qədər ağıllı olduğunu göstərir. Belə şərh verən çox adam var. Tramp, “Obamagate”-lə yeni bir dövr başladıb. Çünki bir mərkəzin, bir paytaxtın və ya bir ölkənin yenilənməsi üçün “köhnələr”in təmizlənməsi tələb olunur. Bu fəlsəfə hazırda ABŞ-da canlıdır.
Barak Obama tamamilə boş bir fiqur olaraq Ağ Evə göndərilmişdi. “İlk qaradərili prezident” formulu mənimsəndiyi üçün Obama seçilmişdi. Ağdərili olsaydı, Obamanın heç senator olmaq şansı da yox idi.
Tramp “Obamagate” gedişi ilə, əslində, Klintonları hədəf alıb. Bill Klintona “Deep Clinton” deyən Tramp, Obama vasitəsilə Klinton ailəsinə, oradan Nyu-Yorkdakı 3 ailəyə, son olaraq da FES-ə hücum edəcək. Bu həmlə bütün dünyada gərginliyin artmasına səbəb olmaqdadır.
Əlbəttə, bu qərar Trampın deyil. Ancaq Tramp kimi çılğın birinin prezident olması lazım idi ki, bu yeni dövr başladılsın.
Trampın prezident seçkilərində rəqibi olan Baydeni siyahıya daxil etməsi də təbiidir. Çünki Tramp 2016-cı ildə verdiyi sözü 2021-ci ildə həyata keçirəcək. Məqsəd budur. Trampın yeni kampaniyasının adı əvvəlkini xatırladır. Tramp “Böyük Amerikanın qayıdışı” adını verdiyi seçki kampaniyası ilə bağlı “4 ildə təməllərini atdıq. İndi ikinci bölümə keçirik” dedi.
“Gallup”-ın rəy sorğusuna görə, Trampın prezident seçiləcəyi qətidir. Koronavirus infeksiyası da bu 4 ilin son həmləsi idi. Tramp koronavirus pandemiyası ilə birlikdə çökən iqtisadiyyatları təkrar böyüdən prezident olacaq. Çin tamamilə ABŞ-ın əlində olan oyuncaq halına gətiriləcək. Əlbəttə, Çin buna etiraz edəcək. Ancaq hər bir etiraz halında dozası artan mesajlar görəcəyik. Çinin Təl-Əvivdəki səfiri Du Veyin neytrallaşdırılması “Dərin Amerika”nın nə qədər sərtləşəcəyini göstərən ilk addımdır. “Dərin Amerika”nın və Trampın hədəfi belədir.
Təbii, qarşı tərəfin də boş durmayacağını görmək çətin deyil. Çinin daxildə rəqəmsal puldan istifadə etməyə başlaması heç də kiçildiləcək bir həmlə deyil. Bu, Vaşinqton üçün kabusdan da betərdir.
ABŞ istədiyi anda Avropa ölkələrinə və Çinə qarşı embaqo tətbiqi haqqında qərar verdirə bilər. Çin bunu bilir. Ancaq “Dərin Amerika” problemi, səfir Du Vey məsələsində olduğu kimi, nöqtə atışları ilə, səssizcə həll etmək istəyir.
Bir çox ölkədə önəmli iş adamlarına cəzalar kəsilib. Xüsusilə Avropadan olan iş adamları koronavirus pandemiyası ilə birlikdə böyük zərbə alıb. Amerikalı iş adamlarına cəza verilməsindən hələ ki, söhbət getmir. Ancaq onlar üçün də bəzi xəbərdarlıqlar hazırlanıb. Düşüncəsində və atdığı addımlarda Vaşinqtonu nəzərə almayan hər kəs “Dərin Amerika”nın hədəfi olacaq.
Ötən günlərdə çox özəl bir şəxs olan Riçard Qrenell haqqında yazmışdım. Prezident Tramp tərəfindən Milli Kəşfiyyat Şurasının direktoru təyin edilən Qrenell çox önəmli bir siyahı paylaşdı. Siyahıda ABŞ-ın sabiq vitse-prezidenti Co Bayden, FTX-nin sabiq direktoru Ceyms Komi, MKİ-nin sabiq direktoru Con Brennan və Milli Kəşfiyyat Şurasının sabiq direktoru Ceyms Klepperin adı diqqəti cəlb etdi. Bunlar olacaq işlər deyil, amma olur. Adı paylaşılanlar adi adamlar deyil. ABŞ-ı idarə etmiş şəxslərdir. Bu şəxslərin Obamaya yaxın olduğuna eyham vurulsa da, hamısının əmri Bill Klindondan aldığını “Dərin Amerika” bilir. Bu şəxslər kəşfiyyatdakı güclərindən istifadə edərək, “Böyük Amerika” planı quranlara mane olmağı bacardılar.
Orada gedən savaşın tərifi, anlayışı budur. General Maykl Flin ABŞ üçün çox önəmli bir şəxsdir. Ancaq “Dərin Amerika” onu, ən azı, bir neçə il qoruya bilmədi. İndi Maykl Flin üçün çox önəmli bir vəzifə düşünülür.
Bill Klintonun yuxusunun qaçdığı da gizli deyil. ABŞ-da prezidentlik etmiş bir şəxs, yəni, Bill Klinton, hər an evinə basqın olacağı qorxusu ilə yaşayır. Riçard Qrenell əlinin Bill Klintona çatması üçün Trampın “Obamagate” gedişini etməsini gözləyirdi. İndi Riçard Qrenell “Dərin Amerika” ilə birlikdə çox sərt əməliyyatlar keçirəcək. Çox sürətlə qərarlar alacaq. Ancaq “Dərin Amerika” araşdırmalara əsasən, 20%-i aşan işsizlik səviyyəsinə görə Trampın məsuliyyət daşıyan şəxs kimi görünməməsi üçün addımlarını ağır atır. Əgər amerikan xalqı Trampa qarşı birləşsəydi, Bill Klintonla başlayan prosesdə Barak Obama kimi, ABŞ tarixinin son 20 ilinə damğa vurmuş çox önəmli 50 nəfər siyahı ilə həbs ediləcəkdi. Ən azı, 50 nəfər həbs ediləcəkdi. Bu ehtimal hələ də qalır.
Bəlli ki, əməliyyatın forması və zamanı barədə anlaşma əldə edilmiş deyil. Ancaq daha da irəli gedilib, Obama və Bill Klintonun ingilis agenti kimi ittiham edilməsi üçün sənədlər belə hazırlanıb. Bəli, ABŞ-ın iki sabiq prezidenti üçün agent dosyesi hazırlanıb. Zarafat kimi görünür, lakin zarafat deyil. Hər iki sabiq prezidentin qərarları Londonun istədiyi şəkildə verməsi haqqında bir çox sənəd var. Hətta danışıqlar belə, gizli arxivlərdə gözlədilir. Həqiqətən, “Dərin Amerika” var, ancaq “Dərin Klinton” da varmış. Ağılasığmaz əlaqələri olan Bill Klintonun həyat yoldaşı Hillari Klintondan gizli saxladığı sirrlər o qədər çoxdur ki, “Obamagate” yanmağa başlasa, heç bir şey əvvəlki kimi qalmayacaq.
Bill Klintonun yeganə xəyalı Co Baydenin prezident seçilməsidir. Ancaq Bayden prezident seçilsə belə, Trampın 4 ildə qurduğu özəl idarəçiliyi dəyişdirməsi üçün 4 il lazım olacaq. Yəni, Bill Klintonu qoruya biləcək güc əldə edə bilməsi çətindir.
“Dərin Amerika” Trampın seçilməsini istəməzsə, Bayden seçiləcəkdir. Bunu Bill Klinton da bilir.
MKİ və Gizli Xidmətdə işləyən bir çox agent prezidentin xalq tərəfindən seçilmədiyini bilir. 2000-ci ildə seçki günü gecə Floridada nələrin baş verdiyini bilirik. El Qor Floridada 40 min səs fərqiylə qalib gəlmişdi. Təbii olaraq, prezident də El Qor olacaqdı. Ancaq bir anda Buşun 537 səs fərqi ilə qalib gəldiyi açıqlandı. Yəni, Floridada prezident dəyişdi.
“Dərin Amerika” daim güclü olub. Əlbəttə, qlobal sərmayənin prezidenti olaraq Ağ Evə gedən Bill Klinton və o təşkilat (yəni, qlobal sərmayə – tərc.) da güclüdür. Doğrusu, bu savaşın həm ABŞ-da, həm dünyanın hər bir nöqtəsində yaşanmasının səbəbi də budur. Koronavirus pandemiyası ilə birlikdə, bu iki böyük güc arasındakı savaş final oyununa dönüb.
Bill Klintonun da içində olduğu struktur daim Çini böyütmək, Trampın arxasındakılar isə məhdudlaşdırmaq istədi. Mübarizə bunun üstündədir. Koronavirusun yayılmasının da səbəbi budur. Bəlkə də ABŞ və Çin iki böyük güc olaraq qalacaq, amma gücün sərhəddi məsələsi hələ də savaş səbəbidir. Matç ortadadır. Təsirlənməyən bir adam belə, yoxdur. Doğrusu, ola bilməz də… Hadisələrə belə baxın.
Tərcümə Strateq.az-ındır
Digər xəbərlər
