Cahangir Hacıyev məhkəmədə son söz söylədi

“Report”un xəbərinə görə, hakim Əfqan Hacıyevin sədrliyi ilə keçirilən prosesdə təqsirləndirilən İ.Hüseynovun vəkil Azər Tağıyev müdafiə çıxışı edib.

O, hüquqlarını müdafiə etdiyi şəxsə qarşı irəli sürülən ittihamların əsassız olduğunu, məhkəmə istintaqı zamanı kobub prosessual pozuntuarla keçirildiyini deyib: "Müdafiə tərəflərinin çoxsaylı müraciətlərinə, vəsatətlərinə baxmayaraq, məhkəmə prosesləri sürətli şəkildə aparılır. Bu da məhkəmə prosesinin qanunsuzluqlara müşahidə olunması deməkdir. Müvəkkilim vəzifəli şəxs olmayıb və onun Beynəlxalq Bankla heç bir bağlılığı olmayıb."

Vəkil ittiham aktında qeyd edilən kreditlərin bir hissəsinin qaytarıldığını və təqsirləndirilən şəxslərin mənimsəmə niyyətlərinin olmadığını bildirib.

A.Tağıyev müvvəkkilinin əvvəllər keçmiş MTN əməkdaşı olduğununa görə, onun azyaşlı övladlarının olmasını, dövlətə xidmətlərinin nəzərə alınaraq barəsində bəraət hökmünün çıxarılmasını istəyib.

Daha sonra dövlət ittihamçısı Fərid Nağıyev replika hüququndan istifadə edib. O, təqsirləndirilən şəxslərin vəkillərinin müdafiə çıxışına münasibət bildirib. Prokuror cinayət işinin materiallarında C.Hacıyevin ailə üzvlərinin xarici ölkələrdə, otellərə, bahalı mağazalara, sağlamlıq mərkəzlərində kartlar vasitəsi ilə ödənişlər etməsi ilə bağlı konkret faktların olduğunu qeyd edib: "Cahngir Hacıyevin həyat yoldaşı Zamirə Hacıyeva heç bir biznes planı təqdim etmədiyi halda ona külli miqdarda kreditlər ayrılıb. Ancaq başqalarına bu şəkildə kreditlərin ayrılması mümkün deyil".

Vəkil Fəxrəddin Mehdiyev C.Hacıyevin ailə üzvlərinin adına ayrılmış pullar haqda da deyilənlərə cavab verib. O, həmin pulların bankdan ayrılan kreditlər əsasında onlara verilməsini sübut edən heç bir fakt olmadığını vurğulayıb.

Prosesdə təqsirləndirilən şəxslər son sözlə çıxış edib. K.Orucov, A.Sultanov, M.Cahangirov, Y.Ələkbərov, İ.Abdullayev çıxışlarında özlərini təqsirli bilmədiklərini, ittihamlarla razı olmadıqlarını deyiblər. Həmin şəxslər kredir komitəsinin qərarlarını və rəhbərliyin göstərişlərini icra etdiklərini bildiriblər və ayrılan kreditlərin hara xərclənməsindən xəbərsiz olduqlarını vurğulayıblar.

Təqsirləndirilən A.Cavadov vəkilinin çıxışını müdafiə etdiyini bildirib. Digər təqsirləndirilən C.Hacıyev və İ.Hüseynov isə son söz üçün məhkəmədən bir həftə vaxt istəyiblər.

Məhkəmənin növbəti prosesi oktyabrın 10-na təyin edilib.

Xatırladaq ki, dövlət ittihamçısı çıxışında C.Hacıyevin 17 il, A.Sultanov, İ.Abdullayev, M.Cahangirov, K.Orucovun hər birinin 8 il, İ.Hüseynovla Y.Ələkbərova 11 il və A.Cavadova isə 12 il 11 ay müddətinə azadlıqdan məhrum edilməsini istəyib. Həmçinin, dövlət ittihamçısı təqsirləndirilən şəxslərinin hər birinin 3 il dövlət və yerli orqanlarda rəhbər vəzifə tutmaqdan məhrum edilməsini tələb edib. Beynəlxalq Bankın nümayəndəsi çıxışında banka dəyən ziyanın tam ödənilməsini istəyib.

Qeyd edək ki, Qeyd edək ki, Azərbaycan Beynəlxalq Bankı” Açıq Səhmdar Cəmiyyətinin İdarə Heyətinin sabiq sədri C.Hacıyev ötən il dekabrın 5-də həbs edilib. Onun barəsində Nərimanov Rayon Məhkəməsində 4 ay müddətinə həbs qətimkan tədbiri seçilib. C.Hacıyev və digər 7 şəxsin - Mərkəzi filialın direktorları işləmiş Y.Ələkbərov və A.Sultanov, Mərkəzi filialın müdiri işləmiş İ.Abdullayev, bankın inzibati binalarının mühafizəsini həyata keçirən “İnter Security” MMC-nin baş direktoru İ.Hüseynov, bankın Nəqliyyat filialının direktoru işləmiş K.Orucov, bankın Nərimanov filialının direktoru işləmiş, hazırda "AFB Bank" ASC-nin Müşahidə Şurasının sədri olan M.Cahangirov və Bakı Fındıq Zavodunun direktoru işləmiş A.Cavadovun Cinayət Məcəlləsinin 179.3.1, 179.3.2 (mütəşəkkil dəstə tərəfindən külli miqdarda mənimsəmə), 308.2 (vəzifə səlahiyyətlərindən sui-istifadə ağır nəticələrə səbəb olduqda), 309.2 (vəzifə səlahiyyətlərini aşma ağır nəticələrə səbəb olduqda), 313-cü (vəzifə saxtakarlığı), 228.1 və 228.4-cü (qanunsuz olaraq silah, onun komplekt hissələrini, döyüş sursatı, partlayıcı maddələr və qurğular əldə etmə, başqasına vermə, satma, saxlama, daşıma və gəzdirmə) maddələri ilə təqsirləndirilmələrinə dair cinayət işinin istintaqı yekunlaşaraq təqsirləndirilən şəxslər, onların müdafiəçiləri iş materialları ilə tanış edilmiş və iş üzrə ittiham aktı Azərbaycan Respublikasının Baş Prokurorluğu tərəfindən iyulun 19-da təsdiq edilərək baxılması üçün aidiyyəti üzrə Bakı Ağır Cinayətlər Məhkəməsinə göndərilib.

Onu da əlavə edək ki, C.Hacıyev, İ.Abdullayev, Y.Ələkbərov və İ.Hüseynov barələrində həbs qətimkan tədbiri seçilib. Həmin şəxslər hazırda həbsdədirlər. Digər 4 nəfər isə zamindədir.