Erməni əsilli məşhur amerikalı qumarbaz Qarabağa gəldi

Den Bilzeryanın Dağlıq Qarabağda “irimiqyaslı proqram” həyata keçirmək niyyətində olduğu bildirilir. Erməni xüsusi xidmət orqanlarına yaxın aysor.am saytının bildirdiyinə görə “poker kralı” məhz bu məqsədlə Qarabağa gəlib.

Hələlik Bilzeryanın həyata keçirəcəyi proqamın hansı istiqamətə yönələcəyi məlum deyil, amma istisna deyil ki, erməni milyoner səfər zamanı qoşunların təmas xəttinə də baş çəkəcək. Sayt bildirir ki, D.Bilzeryanın səfəri Dağlıq Qarabağın “hərbi-siyasi rəhbərliyi səviyyəsində” həll edilib.

Den Bilzeryan 1980-ci ildə ABŞ-ın Florida ştatının Tampa şəhərində anadan olub. Onun atası Pol Bilzeryan əvvəllər Uoll-stritin məşhur treyderlərindən idi və maliyyə maxinasiyalarına görə həbs cəzasına məhkum edilib.

Hesab edilir ki, Den Bilzeryana atasından böyük sərvət qalıb və o, zəngin ailədə harın böyümüş biridir. Bilzeryan peşəkar qumarbazdır və bu sahədə ilk dəfə böyük uğurunu 2009-cu ildə-Dünya poker seriyasında qazanıb. Həmin çempionatda o, 36 min dollar udub. Sonradan o poker çempionatlarında daha yüksək məbləğlər udub. Den Bilzeryan həm də şou proqramlarına qatılır, bir sıra döyüş filmlərində tryuklar icra edir. Onun həm də pleyboy imici var, həmişə çoxsaylı yarıçılpaq qızların əhatəsində olur. İntagram-da olduqca məşhurdur və 15 milyondan çox izləyicisi var.

Den Bilzeryan “Viktory Poker” poker-rumunun əsasını qoyanlardan biridir, onun sərvəti 235 milyon dollara çatır, bəzi məlumatlara görə daha çoxdur. Erməni qumarbazın bu pulları zəngin iş adamlarından udduğu təxmin edilir, lakin ona atasından da xeyli sərvət qalıb.

Bilzeryan həm də silah həvəskarıdır, kolleksiyasında yüzlərlə müxtəlif tipli atıcı silahlar var. O, 1999-cu ildə özünü xüsusi təyinatlı qüvvələrdə sınamaq istəyib və SEAS kurslarına qatılıb, amma kursu bitirmək üçün imtahandan keçə bilməyib.

Belə görünür ki, Dağlıq Qarabağdakı qondarma rejim bu məşhur erməni qumarbazı Azərbaycanın işğal altındakı ərazilərində kazinolar açmağa, bununla da qumar həvəskarı olan xarici turistləri cəlb etməyə inandırıb. Hər halda Bilzeryanın Dağlıq Qarabağa səfərinə Bakı olduqca sərt reaksiya verməlidir.(virtualaz.org)

MilliYol.Az