Sentyabrın 24-də Lənkəran şəhərində azərbaycanlı kriminal avtoritet Rövşən Lənkəranskinin 40 mərasimi keçirilib.
Mərasimdə çoxsaylı rayon əhalisi, həmçinin ölkənin müxtəlif bölgələrindən gələn şəxslərlə yanaşı, Rusiya, Ukrayna, Türkiyə və digər ölkələrdən də qonaqlar olub.
Adının çəkilməsini istəməyən mənbəmizin Musavat.com-a verdiyi məlumata görə, qırx mərasimində Qafqaz Müsəlmanları İdarəsinin sədri Şeyxülislam Allahşükür Paşazadə, deputatlar Cavanşir Paşazadə, Fəzail Ağamalı, Lənkəran rayon İcra Hakimiyyətinin rəsmiləri və digər şəxslər iştirak edib.
Lənkərandakı mənbəmiz bunu da bildirdi ki, dünyanın bir sıra ölkələrindən “yeraltı dünya”ya mənsub bir çox şəxslər R.Lənkəranskinin Kiçik Bazar qəbiristanlığındakı məzarını ziyarət edib, üzərinə əklillər və tər çiçəklər düzərək geri qayıdıblar. Onların bir çoxunun gecə ilə gəlib geri döndükləri barədə də xəbərlər var. Məzar üzərində əksəriyyətinin də üstündə rus dilində yazılar olan əklillər diqqət çəkib. Ziyarət mərasimi çox sakit keçib, heç bir insident qeydə alınmayıb. Diqqətçəkən odur ki, R.Lənkəranskinin məzarının üzərində Azərbaycan bayrağı da ucaldılıb. Mənbəmiz dedi ki, əslində ötən 40 gün ərzində tər çiçəklər bir gün də olsun tanınmış avtoritetin məzarından əskik olmayıb, çiçəklər hər gün təzələnib.
Qətllə əlaqədar araşdırmalara gəldikdə, mənbəmiz ailə üzvlərinə istinadən deyib: “Sifariş verənlərin və qatillərin kimliyi bəllidir. Lənkəranskinin tərəfdarlarının mövqeyi qətidir ki, onun intiqamı alınacaq”. Mənbəmiz bu arada yayılan bir məlumata da diqqət çəkdi: “Məlumat var ki, bir qrup türk və çeçen Almaniyada toplaşıb, Rövşən Lənkəranskinin qisasını alacaqları barədə qərar veriblər. Hər halda şübhə yoxdur ki, bu qətl cavabsız qalmayacaq”.
Xatırladaq ki, Rövşən Lənkəranski bu il avqustun 18-də gecə saatlarında Türkiyədə qətlə yetirilib. Onunla bərabər sürücüsü də öldürülüb. R.Lənkəranski qətlə yetiriləndə onun ailə üzvləri də Türkiyədə olub. (musavat.com)
MilliYol.Az
Digər xəbərlər
loading...
