Bu ilin aprel ayında Tərtər istiqamətində gedən döyüşlərdə şəhid olan heykəltəraş Samir Kaçayevin heykəli hazırlanıb.
APA TV-nin xəbərinə görə, Azərbaycan Dövlət Rəssamlıq Akademiyasının Heykəltəraşlıq fakültəsinin məzunu olan Samirin tələbə yoldaşları, müəllimləri və akademiya rəhbərliyi bütün imkanlarını səfərbər edərək, onun qəbirüstü heykəlinin düzəldilməsinə qərar veriblər.
Azərbaycan Dövlət Rəssamlıq Akademiyasında müəllimi olan Rahib Qarayevlə bəzən emalatxanada gecələyən şəhid Samirin arzuları böyük idi. İlk arzusu Akademiyada qalıb dərs demək olub. Sənətin sirlərini dərindən öyrənərmiş: "Əsgərlikdən qayıdandan sonra magistr oxumalı idi. Lakin aprel döyüşlərində şəhid oldu. Dostlarla fikirləşdik ki, onun heykəlini düzəldək. Heykəlin üstündə bir neçə nəfər işləyə bilməzdi. Qərara gəldik ki, mən işləyəm".
Heykəlin hazırlanması qərarı veriləndən sonra dostları onun doğulub boya-başa çatdığı Şamaxıya yola düşüblər: "Eskizi etməmişdən qabaq Şamaxıya getdik, atası xoş qarşıladı. Dedi, dostunuz, qardaşınız olub. Siz necə bilirsinizsə, elə olsun. Eskizi etdim, sonra portretləri işlədim. Biri gülən üzlü, biri isə daha ciddi obrazlar yaratdım. Axtarışlar etməliydim. Bütöv bir fiqurun üzərində portretin xarakterini, obrazını tapmaq mənə çətin olardı".
Heykəl düz 5 aya başa gəlib. Rahib müəllimin sözlərinə görə, hər bir detalı işlədiyi zaman həmkarları, tələbələri, Akademiyanın rektoru ilə belə məsləhətləşib, onların tövsiyələrinə diqqətlə qulaq asıb: "Biz diplom işini işləyəndə elə olur 50, elə olur 20 eskiz edirik. Bunlardan biri baxış üçün seçilir və sonra onu diplom işinin müdafiəsində təqdim edirik. Samirdə də diplom işində təqdim etdiyi öz işini dəzgahın üstünə qoydum. Fransız heykəltəraş Rodenin portreti idi diplom işi. Əlinə isə bizim işlədiyimiz aləti verdim".
Rahib Qarayev deyir ki, ərsəyə gələn iş bütün kollektivin, Samiri sevənlərin məhsuludur. Hələlik emalatxanada saxlanılan heykəl yaxın günlərdə Şamaxıya aparılacaq və Samirin qəbirüstü abidəsi olacaq.
MilliYol.Az
Digər xəbərlər
loading...
