Rusiya prezidenti Vladimir Putinin iqtisadi məsələlər üzrə köməkçisi Andrey Belousov öz şefinə məktub göndərərək 14 kimya, neft-kimya və metallurgiya şirkətlərindən prezidentin may fərmanlarının yerinə yetirilməsi üçün 500 milyard rubl götürməyi təklif edib. Virtualaz.org xəbər verir ki, bura “Nornikel”, “Alrosa”, “Sibur”, “Severstal” kimi iri şirkətlər daxildir
Prezidentin köməkçisi öz təklifini belə əsaslandırıb ki, həmin şirkətlərin vergi yükü neft-qaz sahəsində işləyən şirkətlərin vergi yükünə nisbətən aşağı olub. Nəticədə onlar yüksək gəlirlər əldə ediblər. Onlardan vergidən əlavə 500 milyard rubl tutub büdcəyə daxil etmək olar. Belousov 2016-cı ildə neft şirkətlərinin yüksək gəlirlərindən tutulmasını xatırladıb. Lakin vergi məcəlləsi şirkətlərin gəlirlərindən vergidən əlavə pul tutmaq üçün imkan yaratmadığından köməkçi Maliyyə Nazirliyinin müvafiq mexanizm hazırlamasını təklif edir.
Putinin mətbuat katibi Belousovdan belə təklif daxil olduğunu təsdiqləyib, amma bildirib ki, məsələ hələ öyrənilir və prezident təklifin hökumətdə baxılmasına razılıq verib. Qərar isə şirkətlərin investisiya imkanlarını saxlamaq şərti ilə qəbul ediləcək.
Putin bu ilin mayında növbəti dəfə prezident səlahiyyətlərinin icrasına başlayanda əhalinin sosial müdafiəsinin və rifahının gücləndirilməsinə dair bir sıra fərmanlar verib. Hansı ki, həmin fərmanları yerinə yetirmək üçün büdcədə vəsait nəzərdə tutulmayıb.
Belousovun Putinə göndərdiyi və “xidməti istifadə üçün” qrifli təklifin mətbuata sızmasından dərhal sonra Moskva fond birjasında şirkətlərin səhmlərini çökdürüb. Siyahıya daxil edilən şirkətlərin səhmləri orta hesabla 2.5-4 faiz ucuzlaşıb.
Təklifə Novolipetsk Metallugiya Şirkətinin sahibi Vladimir Lisin dovşan haqda lətifə ilə cavab verib:
“Dovşan, dəyişirsən?
-Dəyişirəm!
-Rublu 20 rubla?
-Hə!
-Dovşan, bəs bunun harası biznes oldu?
-Görmürsən, rubl alıram, 20 rubl verirəm.
-Məni axmaq hesab etmə, bunu görürəm. Dovşan, sən heç olmasa rentabelliyi hesablamısan?
-Nəyimə lazımdır bu rentabellik, sən bir dövriyyəyə bax!”
Rusiya sənayeçilər və sahibkarlar İttifaqında isə lətifə danışmayıblar, ancaq təklifi tənqid ediblər və bildiriblər ki, təşəbbüs iqtisadiyyatda rəqabətədavamlılığın yüksəlməsinə xidmət etmir. Habelə investorların ölkədən qaçmasına təkan verə bilər.
MilliYol.Az
Digər xəbərlər
loading...
