Son günlər türk lirəsinin kəskin ucuzlaşması Türkiyəyə istirahətə gedənlərin sayını artıb
“The Guardian” qəzeti yazır ki, britaniyalılar daha çox Türkiyəyə üz tuturlar və turizm şirkətləri bu il bilet satışında artım olduğunu deyirlər.
Son bir ildə lirə funt sterlinqə qarşı 34% ucuzlaşıb. Ötən il 100 funt sterlinq 460 lirə edirdisə, indi 697 lirə edir. Bu il funt sterlinq də avro və ABŞ dollarına qarşı ən aşağı həddə düşüb.
“Bir tərəfdən lirə funt-sterlinqə qarşı ucuzlaşıb, digər tərəfdən istilər Türkiyədə dincəlmək üçün yaxşı fürsət yaradıb”, – “Thomas Cook Money” şirkətindən Anth Mooney deyib.
Şirkət bu il Türkiyəyə bilet alanların sayında 63% artım qeydə alındığını bildirir. Antalya bu mənada İspaniyanın “Palma de Malyorka“sını üstələyib. “Thomas Cook Airline” britaniyalı müştərilərə ən çox oraya daşıyırdı. İndi həftədə Antalyaya 57, Palmaya 41 reys gerçəkləşdirilir.
2016-cı ilin terror hücumlarından bəri Türkiyə turizmi dirçəliş dövrünü yaşayır.
“The Guardian” yazır ki, turistlər arasında populyarlığına baxmayaraq, Türkiyə iqtisadi böhranı yoluna qoymağa çalışır. Lirənin ucuzlaşmsına səbəb Türkiyə ilə Donald Tramp administrasiyası arasındakı gərginlikdir. Tramp bildirir ki, Türkiyənin ABŞ bazarına rüsumsuz girişinə yenidən baxır. Bu, 1,7 milyard dollarlıq türk ixracı üzərinə əlavə rüsum qoyulması demək olar.
“Reuters” agentliyi isə lirənin ötən gün – avqustun 9-da bir daha rekord həddə düşməsindən yazır. Ötən gün bir dollar 5,55575 lirəyə bərabərləşib.
Türkiyədə amerikalı rahib Andrew Brunsonun terrorçuluq ittihamları ilə saxlanması tərəflər arasında gərginlik yaradıb. Türkiyə rahibi ev dustaqlığına buraxıb, məhkəməsi davam edir.
Türkiyə nümayəndə heyəti Vaşinqtonda ABŞ rəsmiləri ilə görüşlərdən qayıdıblar. Türkiyə Xarici İşlər Nazirliyindəki mənbənin agentliyə deməsinə görə, rəsmilər Dövlət Departamenti və ABŞ Xəzinədarlığında bir gün görüş keçiriblər, ancaq görüşlərdə hər hansı uğur əldə olunması barədə informasiya verilməyib.
Ankara və Vaşinqton arasında Suriya müharibəsinə müdaxilə, Türkiyənin Rusiyadan raket kompleksləri alması planı, Birləşmiş Ştatlarda türkiyəli bankirin məhkum edilməsi məsələləri ilə bağlı narazılıq var.
Ötən gün Türkiyə Xəzinədarlığı və Maliyyə Nazirliyi bəyanatında bildirib ki, gələn il ÜDM-də 3-4 faizlik artım gözlənir. Bəyanata görə, nazir Berat Albayrak bu gün – avqustun 10-da iqtisadiyyatla bağlı son planını açıqlayacaq.
Bu bəyanatdan sonra lirəyə təzyiq nisbətən azalıb. Ərdogan artıma təkan vermək üçün bankların aşağı faizlə kredit ayırmasını istəyir.
“Heç bir iş görülməsə, artımın inflyasiya-məzənnə-inflyasiya burulğanından çıxmasından ötrü daha böyük bədəl ödənəcək. Məzənnənin nəzarətdən çıxmasının əsas səbəbi odur ki, həm ölkə içində, həm də xaricdəiqtisadiyyatın idarə olunmasına inam itib”, –Bahçeşehir Universiteti nəzdində İqtisadiyyat və Sosial Tədqiqat Mərkəzinin direktoru Seyfettin Gursel deyib.
MilliYol.Az
Digər xəbərlər
loading...
