Meksikanın prezidenti olacaq Andres Manuel Lopez Obrador (Amlo kimi tanınır) maaşını 60 faiz azaltmağı planlaşdırır
Qalib gəlmiş solçu namizəd ayda təxminən 5700 dollar qazanacaq və digər heç bir rəsmi şəxs ondan çox qazana bilməyəcək. Lopez Obrador deyib ki, rəsmi iqamətgah olan Los Pinos mədəniyyət mərkəzinə çevriləcək.
Lakin maaşının azaldılacağını bəyan edən təkcə Meksika prezidenti deyil.
“Bəzi liderlər bu populist addımı atmaqla göstətmək istəyirlər ki, xalqa daha yaxındırlar”. Bunu Leibniz Universitetindən Filip Koeker deyir.
“Reality Check” komandası isə bunun baş verdiyi bəzi ölkələrə nəzər salıb. Mümkün əlavə gəlirləri də nəzərə alsaq baş nazir və ya prezidentin ümumən nə qədər qazandığını demək heç də asan deyil.
Lakin dünya liderlərinin gəlirləri arasında böyük fərq mövcuddur.
Sinqapur baş naziri Lee Hsien Loongun dünyada ən çox qazanan dövlət başçısı olduğu deyilir. O, ildə 2 milyon dollardan çox maaş alır.
Britaniyanın baş naziri Tereza Mey ildə təxminən 200 000 dollar qazanır. Almaniya kansleri Angela Merkelin gəliri isə 260 000 dollardan çoxdur. Çin prezidenti Xi Zinpingin isə sadəcə 22000 dollar aldığı deyilir.
Başqa kimlər maaşlarının azaldılmasına gedib?
2015-ci ilə qədər hakimiyyətdə olmuş Uruqvay prezidenti Joze Mujica dünyanın ən kasıb prezidenti kimi tanınırdı. O, 9700 dollar olan aylıq maaşının 90 faizindən imtina etmişdi.
Bir çox liderlərin maaşlarından qismən imtina etmələrinə baxmayaraq onlar hələ də bir çox imtiyazlardan istifadə edirlər. Lakin Mujica köhnə maşın sürüb və prezident iqamətgahından imtina edərək kiçik bir daxmada yaşayırdı.
Regionda başqa bir ölkənin, Boliviya prezidenti Evo Morales maaşını ayda təxminən 1300 dollara endirib.
Boliviyada heç bir dövlər məmurunun prezidentdən daha çox qazanmasına icazə yoxdur.
2015-ci ildə Braziliyanın prezidenti olmuş Dilma Roussef ölkədəki iqtisadi böhrana görə dövlət iş yerlərinin sayını kəskin azaltmış və öz maaşını da 10 faiz aşağı endirmişdi. Beləcə o, ildə təxminən 68000 dollar qazanırdı.
2015-ci ildə Qərb sanksiyalarına görə Rusiya prezidenti Vladimir Putin və onun işçilərinin maaşlarının 10 faiz azaldıldığı bildirilmişdi. Putin 2017-ci ildə 226 444 dollar qazandığını bəyan edib. Bu məbləğin yarıdan çoxu Moskva ərazisindəki mülkün satışından gəlib.
Bəs kim ümumiyyətlə maaş almır?
Slovakiyanın hazırkı prezidenti Andrej Kiska siyasətə varlı insan olaraq daxil olub. O, prezident kimi bütün maaşını xeyriyyə təşkilatına ianə verir. 2013-cü ildə Slovakiya prezidenti aylıq təxminən 9000 dollar maaş alıb.
Donald Tramp digər ABŞ prezidentlərinin yolunu gedərək maaşının böyük hissəsini xeyriyyə təşkilatlarına verib və yalnız simvolik 1 dollar alıb. ABŞ prezidenti ildə təxminın 400 000 dollar qazanır.
(BBC Azərbaycan)
MilliYol.Az
Digər xəbərlər
loading...
