Samir Şərifov: “Azərbaycan ABŞ-ın Qarabağ münaqişəsinin ədalətli həlli üçün səylərinə böyük ümid bəsləyir”
Bakıda ABŞ-ın Müstəqillik Günü ilə bağlı rəsmi qəbul keçirilib
Bakıda ABŞ-ın müstəqilliyinin 242-ci ildönümü ilə bağlı rəsmi qəbul təşkil edilib.
"Report"un məlumatına görə, tədbirdə əvvəlcə Azərbaycanın və ABŞ-ın dövlət himnləri səsləndirilib.
ABŞ-ın Azərbaycandakı müvəqqəti işlər vəkili Uilyam Qil deyib ki, iyulun 4-ü ailə üzvlərinin bir araya gəlib demokratiyanı qeyd etmək və ABŞ-ın azadlığı uğrunda həlak olanları yad etmək üçün bir bayramdır: "ABŞ prezidenti Vudro Vilson 100 il bundan əvvəl bildirib ki, həm Azərbaycan, həm də ABŞ xalqı tarixi və əsas dəyərləri ehtiramla yad etməklə bizə cəmiyyət olaraq davam etmək istədiyimiz yolu müəyyənləşdirməyə imkan verir. Azərbaycan müstəqilliyini bərpa edəndən sonra bu ölkə ilə çiyin-çiyinə çalışıb. ABŞ müstəqil, sabit və çiçəklənən Azərbaycanı dəstəkləməyə davam edir".
Azərbaycanın maliyyə naziri Samir Şərifov deyib ki, iki ölkə arasında siyasi dialoqun genişləndirilməsi maraqlar çərçivəsində inkişaf edir: "ABŞ Azərbaycanın regionda həyata keçirdiyi transmilli enerji layihələrinə həmişə dəstək verib". O həmçinin iki ölkə arasında həyata keçirilən səfərlərin və dövlət başçılarının bir-birinə ünvanladığı təbriklərin əhəmiyyətindən danışıb.
Dağlıq Qarabağ münaqişəsinə toxunan nazir bildirib ki, Azərbaycan ABŞ-ın ATƏT-in Minsk qrupunun həmsədr ölkəsi kimi bu münaqişənin ədalətli şəkildə həlli üçün səylərinə böyük ümid bəsləyir.
Daha sonra tədbirdə ABŞ ilə bağlı konsert keçirilib.
Digər xəbərlər
loading...
