Sorğunun nəticəsin görə, amerikalıların yarısı prezident Donald Trump-ın impiçmentini dəstəkləyir
"The İndependent" yazır ki, Public Policy Polling (PPP) firmasının keçirdiyi son rəy sorğusuna görə, amerikalıların yarısı prezident Donald Trump-ın impiçmentini dəstəkləyir.
Bu PPP-ın indiyədək apardığı rəy sorğularında impiçment tərəfdarlarının rekord faizidir.
Oktyabrın son günündə keçirilmiş rəy sorğusunda iştirak edənlərin 49 faizi impiçmenti dəstəklədiyini bildirib. Adamların yalnız 41 faizi buna qarşı çıxır.
Ümumiyyətlə isə oktyabr impiçment tərəfdarlarının dalbadal artdığı 6-cı ay olub. Bu ay ərzində prezidentin populyarlığı 7 faiz düşüb.
"The Independent" yazır ki, oktyabr ayı Trump üçün ən çətin aylardan biri olub. Xüsusi prokuror Robert Mueller onun iki keçmiş kampaniya üzvünə qarşı ittiham irəli sürüb.
PPP-nin hesabatı açıqlananda Mueller-in sanksiyaları barədə xəbərlər olsa da, onları hələ açıqlamamışdılar.
Barələrində cinayət işlərinə başlanan iki şəxs keçmiş kampaniya rəhbəri Paul Manafort və xüsusi müşavir George Papadopoulos-dur.
Cənab Trump ittihamları da "saxta xəbərlər" kimi rədd edib və diqqəti əvəzində Hillary Clinton-un Rusiya ilə münasibətlərinə keçirməyə çalışıb.
Lakin seçicilərin böyük əksəriyyəti Rusiya ilə bağlı ittihamların əsaslı olduğuna inanır və Mueller-in Trump-ı araşdırmasını dəstəkləyir.
Prezidentin vergi islahatları da elektorat arasında geniş dəstək tapmayıb. Seçicilərin yalnız 29 faizi respublikaçıların vergi təşəbbüsünü dəstəkləyir.
Trump-ın Obamacare adlanan sistemi ləğv etdirməsini isə hətta onun öz tərəfdarları arasında yalnız 60 faiz dəstəkləyir.
Əslində Trump-ın respublikaçılar arasındakı dəstəyi tənəzzülə uğrayıb. O, sentyabr ayında 2020-ci ilin nominasiyası üçün 34 xalla irəlidəydi, lakin indi bu fərq 21-ə düşüb.
Bu arada bir milyonadək amerikalı milyarder Tom Steyerin başladığı petisiyaya qoşulub. Petisiyada Trump-ın dərhal impiçment edilməsi tələb olunur.
Cənab Steyer TIME jurnalına deyib ki, "Trump Amerikanın sağlamlığına və salamatlığına birbaşa təhlükə təşkil edir".
Bütün dünya üzrə homoseksual münasibətlərin kriminallaşdırılmasına tərəfdar olanların faizi 28, 5-dir
Rəyi soruşulanların yarısı homoseksual münasibətləri cinayət sayır
"The Guardian" yazır ki, 77 ölkə və ərazidə aparılmış sorğuya görə hər dörd nəfərdən biri eynicinsli münasibətlərdə olanlara qarşı cinayət məsuliyyətinin tətbiqini düzgün sayır.
Lakin Ilga-Riwi seksual və gender azlıqlarına münasibət hesabatına əsasən homoseksuallığın kriminallaşdırılmasına münasibət coğrafiyaya görə fərqlidir.
Afrikanın 15 ölkəsində rəyi soruşulanların 45 faizi bu qənaətdədir ki, eyni cinsdən olan seks partnyorları cinayət məsuliyyətinə cəlb edilməlidirlər.
Yaxın Şərq üçün bu rəqəm 36 faizdir.
Avstraliya və Yeni Zelandiyada rəyi soruşulanların isə 15 faizi homoseksual münasibətlərin kriminal əməl olduğuna inanır. ABŞ, Kanada və Qərbi Avropa üçün bu rəqəm 19 faiz olub.
Homoseksuallığın 50 il bundan əvvəl dekriminallaşdırıldığı Britaniyada hər altı nəfərdən biri (17 faiz) belə düşünür ki, seksual və romantik münasibətlərdə olan eyni cinsli şəxslər barəsində cinayət işi qaldırılmalıdır.
Avstraliyada bu rəqəm 16, ABŞ-da isə 18 faiz olub.
Hesabat müəlliflərindən Aengus Carroll bildirib ki, hətta inkişaf etmiş ölkələrdə də kriminallaşdırmaya təxminən 20 faizin tərəfdar olması narahatlıq doğuran göstəricidir.
Ümumilikdə, bütün dünya üzrə homoseksual münasibətlərin kriminallaşdırılmasına tərəfdar olanların faizi 28, 5-dir.
Homoseksuallığın kriminal əməl sayıldığı 25 ölkədə eyni cinslilərin seksual münasibətlərə görə cinayət məsuliyyətinə cəlb edilməsinə rəyi soruşulanların 42 faizi tərəfdardır.
Rəyi soruşulanların 48 faizi bu qənaətdədir ki, onlar dindar olmalarına baxmayaraq homoseksuallar arasında münasibətləri qəbul edə bilirlər. Sorğuda iştirak edənlərin 30 faizi bu ikisinin bir araya sığmadığını bildirib.
Getdikcə daha çox kişi arvadının soyadını qəbul edir
"The Telegraph" yazır ki, Britaniya kraliçasının, öz əri - Edinburgh hersoqunun soyadından imtina etməsi zamanında çox böyük şəxsi təhqir kimi qiymətləndirilmişdi.
Lakin monarx cütlüyün öz platin toylarına hazırlaşdığı bir vaxtda aparılmış yeni araşdırma göstərib ki, getdikcə daha çox kişi arvadının soyadı naminə öz familyasını qurban verir.
London Zərbxanasının dərc etdirdiyi araşdırmaya görə, indi hər 10 kişidən biri arvadının soyadını qəbul edir.
1952-ci ildə kraliça taxta çıxarkən elan edilmişdi ki, monarx familiyası Mountbatten yox, Windsor olacaq. Bu qərar hersoqun dərin qəzəbinə səbəb olmuşdu.
"Mən yalnız lənətə gəlmiş amöbəm, - deyə hersoq çığırmışdı, - Mən bu ölkədə yeganə kişiyəm ki, öz uşaqlarıma soy adımı vermək hüququndan məhrum edilmişəm".
Hazırda evlənənlərin yalnız 72 faizi bəyin soyadını qəbul edir, halbuki yaşı 55-dən yuxarı olanlar arasında 97 faiz kişinin familiyasını daşıyır.
2003 nəfər arasında aparılmış sorğuda iştirak edənlərin 11 faizi qoşa soyad götürməyə üstünlük verdiyini deyib.
Amma başqa məqam da var ki, kraliça və hersoq 1947-ci ildə evlənərkən sədaqət hissi istənilən izdivacın bünövrəsi sayılırdı. İndi rəyi soruşulanların yalnız 36 faizi buna inanır.
Aparılmış son araşdırma göstərib ki, arvadının soyadı qarşısında "diz çökənlər" əsasən gənc kişilərdir.
London Zərbxanası monarx platin toyu münasibətilə xüsusi platin sikkə buraxıb. Bu sikkənin üstündə kraliça və onun ərinin barelyefləri var.
Platin pulun arxa tərəfində "güc" və "vəfa" sözləri yazılıb.
2-ci Elizabeth yubiley toyu ərəfəsində bu sözləri ərini xarakterizə etmək üçün deyib. (bbc.com)
MilliYol.Az
Digər xəbərlər
loading...