Akim Bədəlovun alternativ korrupsiyası: məşhur dövlət katibinin şirkətini ələ keçirdi

«Saxta sənədlərə əsasən “Xəzər”də 50% pay Akim Bədəlovun həyat yoldaşı Mövsümova Akifə Şərif qızına, 25% pay oğlu Bədəlov Aqşın Akim oğluna və 25% pay bacısı oğlu Vəliyev Rizvan Şami oğluna məxsus edilib…»

Sabiq Dövlət katibinin ailəsinə məxsus əmlaklar Alternativ və Bərpa Olunan Enerji Mənbələri üzrə Dövlət Agentliyinin sədri Akim Bədəlovun ailəsinin əlinə necə keçib?

…Prezident İlham Əliyevin 21 oktyabr 2004-cü il tarixli, 462 №-li sərəncamı ilə «Azərbaycan Respublikasında alternativ və bərpa olunan enerji mənbələrindən istifadə olunması üzrə Dövlət Proqramı» təsdiq olunanda hamı sevinirdi ki, nəhayət, bizdə də ucuz və ekoloji cəhətdən təmiz enerji istelakı mümkün olacaq. Amma istehsal yoxdursa, islehlak hardan ola bilərdi. Bs niyə yoxdur???

«Təzadlar» qeyd edir ki, əslində, Dövlət Proqramında da qeyd edilib ki, «Ənənəvi enerji mənbələrinin tədricən tükənməsini və onlardan istifadə zamanı ətraf mühitə vurulan külli miqdarda ziyanı nəzərə alaraq, dünyanın inkişaf etmiş ölkələrində ekoloji cəhətdən təmiz alternativ (bərpa olunan) enerji mənbələrindən (günəş və külək enerjisi, kiçik SES-lər, termal sular, biokütlə enerjisi) geniş istifadə olunur…».

Bu suala qısa cavab verək ki, səbəblər çoxdur. Və bu səbəblərin hamısının baiskarı, əslində, bu sahəyə rəhbərlik edəndir. Uzun illərdir xarici ölkələrdən milyonlarla dollar vəsait hesabına alınıb gətirilən külək generatorları, günəş batareyaları magistral yollarımızda, təpələrin başında uşaq oyuncağı kimi, göz dağı olaraq pas atıb qalıbsa, daha nə deyəsən? Təsəvvür edin, Prezidentin sərəncamı ilə 2004-cü ildə alternativ enerji mənbələri üzrə Dövlət Proqramı qəbul olunur, sonra Sənaye və Energetika Nazirliyinin tərkibində Alternativ və Bərpa Olunan Enerji Mənbələri üzrə Dövlət Agentliyi yaradılır, Akim Bədəlov həmin agentliyə direktor təyin olunur… Alternativ enerji istehsalımız isə ölü nöqtədən tərpənmir…

Bəs nə etməli ki, Akim Bədəlov özünün potensial enerjisini alternativ enerji istehsalında meydana qoysun???

Vəziyyət yaxşılığa doğru dəyişmir, amma dəyişməlidir, bu zamanın tələbidir. İl boyu günəşli və küləkli bir ölkədə alternativ enerjidən istifadə edilməməsinə görə adam bu sahəyə rəhbərlik edilənlərin, etimad göstərilənlərin yerinə utanmaq istəyir… Bəs nə etməli ki, Akim Bədəlov özünün potensial enerjisini alternativ enerji istehsalında meydana qoysun??? 2013-cü ilin 1 fevral tarixindən isə Akim Bədəlov Prezidentin Sərəncamı ilə Alternativ və Bərpa Olunan Enerji Mənbələri üzrə Dövlət Agentliyinin sədri təyin edilir.

Lakin yenə də Bakı kimi küləkli və günəşli bir paytaxta belə arzulananlar reallığa çevrilmir… Bu dəfə Prezident İlham Əliyev Agentliyin statusunu dəyişməyə qərar verir ki, bəlkə bir iş görüldü. Prezidentin 24 noyabr 2016-cı il tarixli “Mərkəzi icra hakimiyyəti orqanının statusuna bərabər sayılan dövlət orqanı” hüquqi statusuna malik Azərbaycan Respublikasının Alternativ və Bərpa Olunan Enerji Mənbələri üzrə Dövlət Agentliyinin bazasında Energetika Nazirliyinin tabeliyində “Azərbaycan Respublikasının Alternativ və Bərpa Olunan Enerji Mənbələri üzrə Dövlət Agentliyi” publik hüquqi şəxs yaradılır. Yenə də «köhnə hamam, köhnə tas…».

Deməli, toplananların yerini dəyişəndə cəm dəyişmədiyi kimi, adın, hüquqi statusun dəyişməsi də vəziyyətin dəyişməsi mümkün deyil. Qalır bu sahəyə rəhbərlik edənin, yəni Akim Bədəlovun dəyişməsi… Amma Akim Bədəlov da, onu müdafiə və mühafizə edənlər də bilməlidir ki, Prezident İlham Əliyevin də səbri tükənməz deyil…

Başı sabiq Dövlət katibinin ailəsinin mülk qalmaqalına qarışmış direktor…

«Təzadlar»a sabiq dövlət katibi, mərhum Tofiq İsmayılovun qızı Səbinə İsmayılovanın Prezident İlham Əliyevə ünvanlı müraciəti daxil olub. Müraciəti olduğu kimi təqdim edirik:

13 mart 1987-ci il tarixdə SSSR-i Nazirlər Sovetinin, Professional Birliklərin Ümumittifaq Mərkəzi Sovetinin və Ümumittifaq Lenin Kommunist Gənclər Birliyinin Mərkəzi Komitəsinin ”Vahid ümümdövlət gənclərin elmi-texniki yaradıcılıq sisteminin yaradılması barədə” 321 saylı qərarı çıxmışdır. Həmin qərardan sonra rayon komsomol komitələri nəzdində Gənclərin Elmi Texniki Yaradıcılıq Mərkəzlərinin (mətndə sonra-Mərkəz) yaradılması SSRİ üzrə geniş şəkildə həyata keçirildi. Bu ondan irəli gəlirdi ki, Mərkəzlərə geniş iqtisadi, o cümlədən xarici ölkələrlə fəaliyyət imkanları və tamamilə vergidən azadolma güzəştləri verilmişdir. Mərkəzlər yalnız gəlirlərinin 3(üç)% ümumittifaq və 27(iyirmi yeddi)% yerli Mərkəzlərin koordinasiya sovetlərinin fonduna ödəyirdilər.

Bütün proqressiv yeniliklərə həssas olan T.İsmayılov 1989-cı ilin mart ayında Kosmik Tədqiqatlar Elm İstehsalat Birliyinə (mətndə sonra-Birlik) rəhbərlik edən dövrdə keçmiş Kirov (indiki Binəqədi) rayonu Komsomol komitəsi nəzdində “Xəzər” Mərkəzini yaradır, müəssisənin fəaliyyəti üçün Binəqədi rayonu 12-ci Aşırım küç. 68A ünvanda tikili və torpaq sahəsinin ayrılmasına nail olur.

Həmin dövrdə Birlikdə elmi işçi olan Bədəlov Akim Bədəl oğlu 1989-ci ilin may ayında “Xəzər”ə direktor seçilir. Bilavasitə ümumittifaq büdcəsindən maliyyələşən Birlikdən “Xəzər”in hesabına bağlanmış müxtəlif müqavilələr üzrə külli miqdarda vəsaitlər köçürülürdü, kommersiya əməliyyatları və müxtəlif quraşdırma işləri aparılırdı, elmi və istehsal işləri üçün müasir və qiymətli qurğular və avadanlıqlar alınırdı. T.İsmayılovun rəhbərliyi ilə alternativ energetika üzrə elmi və eksperimental layihələr həyata keçirilirdi. Mərhum atam Moskvadan cəlb edilən vəsaitlər hesabına gənclərə, elm işçilərinə qazanc əldə etmək imkanı yaradırdı və təbii olaraq öz ailəsinin təminatını da düşünürdü. “Xəzər”in gəlirləri bütünlüklə Birliyin sifarişləri və ödənişləri hesabına formalaşırdı.

1990-cı ildə ümumittifaq miqyasında fəaliyyətlərində ciddi sui-istifadələrlə əlaqədar Mərkəzlər üçün nəzərdə tutulan güzəştlər ləğv edildi. Bu səbəbdən 1991-ci ilin martında “Xəzər”in Komsomol komitəsi nəzdindən çıxarılaraq müstəqil şəkildə fəaliyyətinə qərar verildi. Yaradılmasında və fəaliyyətində atam həlledici şəxs olduğuna görə onun qərarı ilə kollektiv mülkiyyət formasında yenidən təşkil edilən “Xəzər”də əsas pay mənə verilmişdi və 6 mart 1991-ci il tarixdə keçirilən payçıların iclasının 8 saylı protokoluna uyğun müəssisənin nizamnaməsi tərtib olunmuşdur (Qoşma-1). A.Bədəlov Mərkəzə yenidən direktor vəzifəsinə seçilmişdi. 23.08.1991-ci il tarixdə yeni təşkil edilən “Xəzər” Kirov rayonu Xalq Deputatları Sovetində qeydiyyatdan keçdi və A.Bədəlov direktor vəzifəsində təsdiq edildi (Qoşma-2). Həmçinin həmin müddətdə A.Bədəlov bu vəzifə ilə bərabər, Birliyin yeni yaradılmış Ekologiya İnstitutunda ödənişsiz direktor müavini vəzifəsinə təyin edildi (Qoşma-3) və Birliyin baş direktoru T.İsmayılov Ekologiya İnstitutu ilə “Xəzər”in birgə fəaliyyət istiqamətləri barədə əmr verdi (Qoşma-4).

20 noyabr 1991-ci il tarixdə atam T.İsmayılov Qarabağ səmasında faciəvi şəkildə həlak oldu. Atamın vəfatından sonra bütün bu müddət ərzində “Xəzər” podratçı şəkildə iri tikintilər apardığına baxmayaraq Akim Bədəlov bizə böyük fasilələrlə cuzi məbləğlər ödəyirdi və bildirirdi ki, guya iri maliyyə xərcləri var, işləri qaydasına düşən kimi ailəmizə olduğu bütün öhdəlikləri ödəyəcək. “Xəzər”in apardığı tikintilər sırasında eks-deputat Dünyamin Xəlilova məxsus “Qlobus Plaza”, eks-Beynəlxalq Bankın sədri Cahangir Hacıyevə məxsus Zaqatala stadionu, Ali Məhkəmənin binası, tikintisi yarımçıq qalan Respublika Uşaq Diaqnostika Mərkəzi və bir çox digər tikintilər. Lakin 2013-cü ilin fevral ayından Alternativ və Bərpa Olunan Enerji Mənbələri üzrə Dövlət Agentliyinə sədr vəzifəsinə təyin olunandan sonra A.Bədəlov ailəyə pul ödəməkdən imtina etdi. Anam Lalə İsmayılova A.Bədəlovun iş yerinə gedərək ondan bu məsələlərə aydınlıq gətirilməsini istədi. Lakin A.Bədəlov ona hədə-qorxu gələrək aşağıdakıları bildirmişdir: «…Tofiq İsmayılovun “Xəzər”in yaradılmasında heç bir rolu olmayıb. Mənə, A.Bədəlova o vaxtlar Moskvanın Siyasi Bürosu Bakıda T.İsmayılovu güdməyi tapşırmışdı. İşimi yaxşı gördüyümə görə Siyasi Büro “Xəzər”i mənə bağışlayıb. Mənim kim olduğumu heç kəs bilmir, mənim möhkəm arxam var və “Xəzər”in məsələsini qaldırsanız sonradan peşiman olaçaqsınız…».

Bildirirəm ki, Akim Bədəlov keçmiş MTN-nın cinayətkar dəstəsinin aktiv üzvü olan bacısı oğlu, MTN-nin hava limanı üzrə keçmiş idarə rəisi Pərviz Vəliyevə arxalanaraq ailəmizə hədə-qorxular gəlirdi. Biz məcbur olub vəkillər vasitəsi ilə araşdırmalar apardıq və “Xəzər”in saxtakarlıq yolu ilə mənimsənildiyini aşkar etdik. “Xəzər”də baş verən saxtakarlıqlar aşağıdakı ardıcıllıqla həyata keçirilib:

-1995-ci ildə Nazirlər Kabineti bütün müəssisələrin Ədliyyə Nazirliyində təkrar qeydiyyatdan keçməsi barədə qərar qəbul edir. “Xəzər”in 03.03.1995-ci il tarixli 1 nömrəli saxta iclas protokolunu əldə etmişik. Bu protokolda iclasda “Xəzər”in 6 (altı) nəfər müdiriyyətinin, yəni payçıların iştirakı göstərilib, lakin onların adları və imzaları yoxdur. Protokolda həm də “Xəzər”in nizamnaməsinin Ədliyyə Nazirliyində qeydiyyatdan keçirilməsi qərarının qəbul edildiyi göstərilir (Qoşma-5). Bundan sonra isə 10.08.1995-ci il tarixdə “Xəzər”in təsisçiliyi ilə əlaqədar ortalığa bir müəmmalı sənəd çıxır. A.Bədəlov və üç nəfər qohumu “Xəzər”ə dair təsis müqaviləsi bağlayır, müqaviləni bağlayanlar təsisçi elan edilir. Müqavilə üzərində Bakı şəhəri 34 saylı notariat kontorunun 29.08.2015-ci il tarixli ştampı var (Qoşma-6). Bu müqavilə ilə əlaqədar vəkillərimizin sorğusuna cavab olaraq Ədliyyə Nazirliyinin Notariat Arxiv İdarəsindən aldığımız məktubda və notariat reyestr kitabından çıxarışda göstərilir ki 34 saylı notariat kontorunun müqavilə üzərində olan ştampı ilə təsdiqlənən 3654 saylı hüquqi hərəkət təsis müqaviləsinin təsdiqi yox, müqavilə iştirakçılarından biri olan və yuxarıda qeyd edilən Pərviz Vəliyevin qardaşı Rizvan Vəliyevin imza nümunəsinin düzgünlüyünün təsdiq olunmasına görədir. Notarial qaydada təsdiq olunmayan bu təsis müqaviləsi “Xəzər”in 06.03.1991-ci il tarixdə 8 saylı iclas protokoluna əsasən qəbul edilmiş nizamnaməsinə tam ziddir və müəssisənin qanuni sahiblərinin hüquqlarının mənimsənilməsi deməkdir. Lakin bu saxta təsis müqaviləsi Ədliyyə Nazirliyində əsas kimi qəbul edilir, 25.09.1995-ci il tarixdə “Xəzər”in yeni saxta nizamnaməsi (Qoşma-8) Bədəlov və onun qohumlarının təsisçiliyi ilə qeydiyyatdan keçir və müəssisəyə qeydiyyat şəhadətnaməsi verilir (Qoşma-9). “Xəzər”in qanuni 1991-ci ildə qəbul edilmiş və 1995-ci ildəki saxta nizamnamələrindən aydın görünür ki, müəssisənin adı, hüquqi ünvanı və bank hesabı eynilik təşkil edir. Hüquqi ünvanların bir olduğunu A.Bədəlovun 11.02.1993-cü il tarixdə “Xəzər”ə məxsus obyektdə mağaza açılmasına icazə üçün Binəqədi rayonu İcra Hakimiyyətinə ünvanlanan məktub və məktuba verilən müsbət cavab sübut edir (Qoşma-10). “Xəzər”in hüquqi ünvanı yalnız 08.12.2004-cü il tarixdə dəyişdirilmişdir (Qoşma-11). “Xəzər”in hüquqi ünvanı dəyişdirildikdən sonra müəssisəyə məxsus torpaq və tikili qanunsuz olaraq balansından çıxarılmışdır.

«Həmin saxta sənədlərə əsasən “Xəzər”də 50% pay Akim Bədəlovun həyat yoldaşı Mövsümova Akifə Şərif qızına, 25% pay oğlu Bədəlov Aqşın Akim oğluna və 25% pay bacısı oğlu Vəliyev Rizvan Şami oğluna məxsusdur…»

Cənab Prezident!

Atamın vəfatından sonra “Xəzər”in bank hesabında da külli miqdarda maliyyə vəsaitləri qalmışdır. “Xəzər”in təsisçiliyi ilə əlaqədar saxtakarlıqlar növbəti illərdə davam etmişdir. Belə ki 10.12.2009-cu il tarixdə müəssisədə saxta pay alqı-satqısı aparılmışdır (Qoşma-12) və 11.08.2010-cu il tarixdə “Xəzər”in yeni sahiblərinin pay bölgüsü Dövlət qeydiyyatına alınmışdır (Qoşma-13). Hal-hazırda həmin saxta sənədlərə əsasən “Xəzər”də 50% pay Akim Bədəlovun həyat yoldaşı Mövsümova Akifə Şərif qızına, 25% pay oğlu Bədəlov Aqşın Akim oğluna və 25% pay bacısı oğlu Vəliyev Rizvan Şami oğluna məxsus edilib.

Yuxarıda göstərilən faktlar tam çılpaqlıqla subut edir ki, hazırda fəaliyyət göstərən “Xəzər” 1991-ci ildə təşkil edilən müəssisədir və saxtakarlıq yolu ilə qanuni sahiblərindən alınıb. “Xəzər”in qanuni sahiblərinin adları, o cümlədən əsas payçı kimi mənim adım, 1991-ci ilin nizamnaməsində qeyd edilən 8 saylı protokoldadır. Lakin atam Vətən yolunda, dövləti vəzifəsini yerinə yetirərkən faciəvi şəkildə həlak olduğuna görə protokolun nüsxəsini ailəsinə vermək imkanı olmamışdır. Ailəmiz A.Bədəlovun sözləri və vədlərinə inanaraq, onu mərhum atama sadiq insan kimi tanıyırdı və ondan heç bir sənəd tələb etmirdi. A.Bədəlov ailəmizin ona olan etibarından yararlanaraq 8 saylı protokolun nüsxələrini aradan çıxarıb.

Bütün instansiya məhkəmələrində biz vəsadət qaldıraraq A.Bədəlovdan o dövrdə “Xəzər”in direktoru olduğu üçün müəssisənin əsl təsis sənədi olan 8 saylı protokolu məhkəməyə təqdim edilməsini tələb etmişik. Lakin 8 saylı protokolun təqdim edilməsindən imtina edilib və məhkəməyə qeyri adekvat arayışlar təqdim edilib (Qoşma14).

«Biz hələ də inanmırıq ki, Ali Məhkəmənin sədri cənab Ramiz Rzayev qudasının hərəkətlərinə bəraət qazandırsın…»

Məhkəməyə saxtakarlıqları subuta yetirən bütün sənədlər təqdim olunduğundan və cinayət əməllərini subuta yetirən faktlar olduğundan işin prokuror istintaqına göndərilməsi ilə əlaqədar vəsadətlərimizə baxmayaraq qətnamələrdə saxtakarlıq faktları barədə bir kəlmə belə yazılmamışdır və vəsadətlərimiz rədd edilmişdir. Çünki onun qudası Ali Məhkəmənin sədri Ramiz Rzayevdir. Məhkəmə hakimləri qorxularından ədalətə qılınc çəkirdilər.

Bundan başqa, məhkəmələr “Xəzər” yaradılan dövrdə Birlikdə işləyən və “Xəzər”də mənim əsas pay sahibi olduğum barədə dəqiq məlumatı olan şahidlərin ifadələrini qəbul etməmişdir və iddiam təmin edilməmişdir. Məhkəmələrin bu qanunsuzluqlara göz yummasının əsas səbəbi isə, yuxarıda qeyd etdim, Ali Məhkəmənin sədri Ramiz Rzayevin A.Bədəlovla quda olmasıdır.

Hörmətli cənab Prezident!

Onsuz da ailəmiz Tofiq İsmayılov kimi bir vətənpərvər insanı itirib, onun adı Azərbaycan xalqının ürəyində belə də qalıb. Tofiq İsmayılov canını Azərbaycanın azadlığı yolunda qurban verməyə qıymadı, özünü oda vurdu. Necə ola bilər ki, belə bir insanın-vətənpərvərin ailəsi bu gün dövlət məmuru Akim Bədəlovun əndazəy2ə sığmayan hərəkətinin qurbanı olsun?! Biz niyə maddi sıxıntıların məngənəsində əziyyətlər çəkməliyik? Ona görə ki, haqq və ədalət mücəssiməsi olan məhkəmələrdə Akim Bədəlovun qudası durur? Biz hələ də inanmırıq ki, Ali Məhkəmənin sədri cənab Ramiz Rzayev qudasının hərəkətlərinə bəraət qazandırsın. Amma çox istərdik ki, o, qudası Akim Bədəlova izah etsin ki, Tofiq İsmayılov kimi bir ailəni bu vəziyyətə salmağı nə göydə Allah bağışlayacaq, nə də yerdə Prezidentimiz İlham Əliyev!

Cənab Prezident!

Müraciətdə göstərilən və saxtakarlıqları sübuta yetirən sənədləri Sizə təqdim edirəm. Həyatını vətənimizin və xalqımızın yolunda qurban vermiş vətənpərvər alimin-Tofiq İsmayılovun yadigarı olan ailəsi ədalətin bərqərar olunmasını istəyir. Bizə köməklik göstərməyinizi Sizdən Xahiş edirik.

Böyük hörmətlə:

Səbinə Tofiq qızı İsmayılova”