“Zəfəran Hospital”da əməliyyatdan sonra vəfat edən 22 yaşlı model Leyla Oruclunun anası bir çox gizli qalan məqamlara aydınlıq gətirib.
MilliYol.Az azxeber.com-a xəbər verir ki, Sevinc Oruclu qızının ölümü ilə bağlı gizlədilən məqamların olduğunu və bütün bunların ortaya çıxacağını açıqlayıb: “Biz hələ yasdayıq. Sabah ağır bir gündür və qızımın ölümünü hələ də qəbul edə bilmirəm. Nə baş verdiyini dərk edə bilmirəm. Əgər qızımı əməliyyat edən Siruz Qoçxani “mən günahsızam” deyirsə, o zaman bizim qaranlıq qalan suallarımıza aydınlıq gətirməlidir. Leyla model idi və işində ciddi uğurlara imza ata biləcək potensiala sahib idi. Biz dəfələrlə onun heç bir əməliyyata ehtiyacı olmadığını desək də, psixoloji olaraq bunu özündə kompleks halına gətirmişdi.
O düşünürdü ki, artıq piylərə sahibdir. Bir çox cərrahın yanında olub. Ancaq onlardan heç biri qızımı əməliyyata götürməyib. Çünki buna ehtiyac olmadığını və əməliyyatlıq olmadığını deyiblər. Təsəvvür edin, hadisədən sonra bizə Mübariz həkim (red: plastik cərrah) zəng edərək “Axı mən o qıza əməliyyatlıq olmadığını demişdim”, – dedi. Əlbəttə, bizim bundan xəbərimiz belə yox idi. Həkim qızımda piy qatının olmadığını, sadəcə, özündə kompleks halına gətirdiyini söyləyib”.
Leylanın anası cərrah Siruz Qoçxaninin hansı səbəbdən başqa klinikada verdirdiyi analizlər əsasında əməliyyata girdiyinin hələ də sual altında olduğunu bildirib: “Bilirsiniz ki, əgər bir xəstə əməliyyata alınırsa, onun bütün analizləri öncədən edilir. Qızıma bu xəstəxanada heç bir analiz verdirməyiblər. Yalnız digər xəstəxanalarda olan analizlərin cavablarından istifadə ediblər. Az-çox tibbi biliyi olan hər kəs bilir ki bu, yolverilməzdir. Digər bir tərəfdən, əgər bu qız özü əməliyyata giribsə, niyə heç kim onun yaxınlarına zəng edib məlumat verməyib. Ən azından, bu insanın əməliyyat zamanı yanında bir nəfərin olması lazımdır. Niyə ondan ailə yaxınlarının nömrəsi istənilməyib. Önəmli olan məqam isə, xəstəxananın əməliyyatla bağlı qəbz verməməsidir. Mən hələ də axtarıram və heç bir qəbzə rast gələ bilmirəm”.
Ananın sözlərinə görə “Zəfəran Hospital” qızının əməliyyatla bağlı ödədiyi məbləği geri qaytarıb: “Əməliyyatın pulunu geri qaytarıb dedilər ki, bu pul sizindir. Mən o pula əl vura bilməzdim. Maraqlıdır, həmin məbləği niyə geri qaytardılar? Öz səhvlərini yumaq istəyirlər? Niyə əməliyyatla bağlı bir qəbz ortalıqda yoxdur? Biz bütün addımları atacağıq ki, bu işə hüquqi qiymət verilsin”.
Leylanın atası da danışarkən öz acısını gizlədə bilməyib. O, ölümün hansı səbəbdən gerçəkləşdiyini öyrəndikdən sonra bir şey deyəcəklərini söyləyib: “Biz hələ öz acımızı yaşayırıq. Amma bu, o demək deyil ki, bu iş başlı-başına buraxılacaq. Bütün hüquqi addımları atacağıq. O həkim hələ bir dəfə bizimlə əlaqə yaratmayıb. Mən dəqiq bir şey deyə bilmərəm. Ancaq bütün qaranlıq məqamlar aydınlanmalıdır. Heç nə gizli qala bilməz”.
Atanın sözlərinə görə, əməliyyat zamanı qızına qan lazım olub. O, həkimin qan qrupunu dəyişik salması ilə bağlı iddiaya da cavab verib: “Qan qrupunu səhv salmaları, yoxsa əməliyyatda hansısa bir səhvə yol vermələri ilə bağlı iddialar da istisna deyil. Araşdırma gedir. Bütün bunlara araşdırmalardan sonra hüquqi cavab veriləcək. Lazım olsa, İran səfirliyinə də həkimlə bağlı müraciət edəcəm”.
Qeyd edək ki, model qızın ölümündə günahlandırılan iranlı həkim Siruz Qoçxani ötən gün açıqlama verərək bildirib ki, Leyla Oruclu pioemboliya diaqnozundan dünyasını dəyişib.
S.Qoçxani bu hadisədə günahı olmadığını və ölüm hadisəsi ilə bağlı prokurorluqda izahat verdiyini də deyib: “Bu, cərrahi əməliyyatdır və hər zaman belə hallara hazır olmalıyıq. Təəssüflər olsun ki, Azərbaycan reallığında bu cür hadisələrdə həkimlər günahlandırılır”.
Qeyd edək ki, Leyla Oruclu əməliyyatdan iki gün sonra, 25 iyun tarixində vəfat edib.
MilliYol.Az
Digər xəbərlər
loading...
