Əli Əhmədov: “Heydər Əliyevin qayıdışı baş tutmasaydı, indi tamam fərqli Azərbaycanda yaşayırdıq”
Ötən əsrin 90-cı illərində Azərbaycanda böhran hər bir insanın həyatını cəhənnəmə döndərmişdi. Bütün bunlar insanları narahat edirdi, gələcəklə bağlı qaranlıq təsəvvür var idi.
Trend-in məlumatına görə, bunu bu gün Yeni Azərbaycan Partiyasının (YAP) təşkilatçılığı ilə 15 iyun - Milli Qurtuluş Günü münasibəti ilə "Azərbaycan dünyaya günəş kimi doğacaq" adlı tədbirdə baş nazirin müavini, Yeni Azərbaycan Partiyasının (YAP) sədr müavini - icra katibi Əli Əhmədov deyib.
Ə.Əhmədov qeyd edib ki, insanlar Azərbaycanın, ailəsinin gələcəyini qaranlıq görürdülər: “Bütün bunlar Heydər Əliyevin Azərbaycana dönüşünün zəruriliyini reallığa çevirmişdi. Heydər Əliyevin dönüşü ilə Azərbaycanda insanları narahat edən problemlər onun müdrikliyi, dövlət xadimi kimi uzaqgörənliyi ilə tədricən aradan qaldırıldı. Təsadüfi deyil ki, müasir Azərbaycanın banisi Heydər Əliyev sayılır. İqtisadiyyatımız inkişaf etməyə başladı, uğurlu neft strategiyası həyata keçirildi".
Baş nazirin müavini bildirib ki, Heydər Əliyevin möhtəşəm qayıdışı, Milli Qurtuluş baş tutmasaydı, indi tamam fərqli Azərbaycanda yaşayırdıq. O Azərbaycan, bu gün fəxr duyduğumuz Azərbaycandan fərqli olacaqdı.
Ə.Əhmədov bildirib ki, ümummilli lider qayıtdıqdan sonra Dağlıq Qarabağ münaqişəsinin ağırlıqlarının aradan qaldırılması istiqamətində işlər görüldü:
"Erməni hərbi birləşmələrinin torpaqlarımızın işğalı dayandırıldı. Eyni zamanda, iqtisadiyyatımızın inkişafı üçün fundamental əsaslar yarandı. Milli Qurtuluş bu gün də davam etməkdədir. Azərbaycanın bugünkü inkişafı, Prezident İlham Əliyevin rəhbərliyi ilə həyata keçirilən siyasət də Milli Qurtuluşun davamıdır, ondan ilhamlanır".
Ə.Əhmədov qeyd edib ki, Azərbaycan XX əsrin sonlarında müstəqilliyini əldə etmiş ən uğurlu dövlətlərdən biri kimi qiymətləndirilməlidir və qiymətləndirilir:
"Azərbaycan möcüzə kimi qiymətləndiriləcək bir inkişafa nail olub. Azərbaycan iqtisadiyyatı 3,5 dəfə artıb. İl ərzində iqtisadiyyatlarını 3-5 faiz artıran dövlətlər bundan qürur duyurlar. Azərbaycan 12-13 il ərzində iqtisadiyyatını 300-350 faiz artırıb".
Baş nazirin müavini nəzərə çatdırıb ki, pensiyalar 12-13 il ərzində 250 faiz artıb: "Bu gün pensiyaların daha da artırılması istənilə bilər və bu, təbiidir. Ancaq əldə edilən uğurlar da göz qabağındadır. Bu gün Azərbaycan Prezidenti İlham Əliyevin rəhbərliyi altında yeni iqtisadi transformasiya yaşanmaqdadır. Milli Qurtuluş məfkurəsi inkişafı şərtləndirir. Azərbaycan indi tükənən iqtisadi resurs strategiyasından tükənməyən iqtisadi resurslar strategiyasına, yeni iqtisadi inkişaf strategiyasına keçib. Azərbaycan iqtisadiyyatı yeni mərhələyə keçəcək, insanların rifahının daha yüksək səviyyəyə qaldırılması üçün yeni imkanlar əldə edilmiş olacaq. Qurtuluş məfkurəsi öz möcüzəsini ikinci və daha sonrakı mərhələlərdə göstərmək gücündə ola bir enerjidir".
MilliYol.Az
Digər xəbərlər
loading...
